काठमाडौं, मंसिर ३०
एक नाबालिगलाई यौन दुरुपयोग गरेको द्दामा नवलपुर जिल्ला अदालतको फैसला उल्ट्याँउदै उच्च अदालत पोखराबाट सफाइ पाएका अभिनेता पल शाहको मुद्दा सर्वोच्च अदालतले दोहोर्याएर हेर्ने भएको छ ।
उच्च अदालतका तत्कालीन कामु मुख्य न्यायाधीश डिल्लीराज आचार्य र न्यायाधीश श्रीधराकुमारी पुडासैनीको संयुक्त इजलासले आरोपको दावी नपुग्ने ठहर गर्दै २०७९ फागुन १४ गते पल शाहलाई सफाइ दिएको थियो । उक्त फैसलाविरूद्ध महान्यायाधिवक्ताको कार्यालयले सर्वोच्च अदालतमा दोहोर्याएर हेरि पाउँ भन्दै निवेदन दिएको थियो । उक्त निवेदनमा सुनुवाइ गर्दै न्यायाधीश सुष्मालता माथेमा र हरि फुयाँलको इजलासले उच्चको फैसला दोहोर्याएर हेर्न अनुमति दिएको हो ।
उच्च अदालतका न्यायाधीशले पल शाहको मुद्दामा प्रमाणको मूल्यांकन राम्रोसँग नगरेको, कानुनहरूको व्याख्या त्रुटिपूर्ण तरिकाले गरेको र नाबालिग बलात्कारका मुद्दामा सर्वोच्च अदालते प्रतिपादन गरेका सिद्धान्तको प्रतिकूल हुने गरी सफाइ दिएको भन्दै सरकारी वकिल सर्वोच्चमा गएका थिए ।
माथेमा र फुयालको गत मंसिर २२ गतेको आदेशमा भनिएको छ– ‘यसमा पीडित नावालक रहेको देखिएकोले पीडितको बकपत्र र प्रतिवादीको बयान तथा शारीरिक परीक्षण प्रतिवेदन तथा चिकित्सकको बकपत्र, पीडित र प्रतिवादी बीचको अडियो रेकर्ड र त्यसको प्रतिवादीबाट अदालतको बयानको स.ज.११ मा गरेको स्वीकारोक्ति समेतका प्रमाणको समुचित मूल्यांकन नगरी भएको उच्च अदालत पोखराको फैसलामा प्रमाण ऐन तथा मुलुकी अपराध संहिताको व्याख्यात्मक त्रुटि र सर्वोच्च अदालतबाट प्रतिपादित सिद्धान्त समेतको प्रतिकूल भएकाले प्रस्तुत मुद्दा दोहोर्याइ हेर्ने अनुमति प्रदान गरिएको छ ।’
शाहलाई बाल यौन दुरूपयोग मुद्धामा नवलपुर जिल्ला अदालतले पल शाहलाई २ वर्ष ६ महिना कैद सजाय, २५ हजार जरिवाना र पीडितलाई १० लाख क्षतिपूर्ति दिनुपर्ने गरेको थियो ।
यता, तनहुँ जिल्ला अदालतले भने पललाई सफाइ दिने फैसला गरेको थियो । बलात्कारको मुद्धा लागेपछि पल शाहले ०७८ फागुन १४ गते जिल्ला प्रहरी कार्यालय तनहुँ समक्ष आत्मसमर्पण गरेका थिए ।
