Fri2024 May 24
२०८१ जेठ ११, शुक्रबार

बचतकर्ताको रकमले तीन करोडको गाडी चढ्थे अध्यक्ष, १०० रोपनी जग्गा पनि किने

12

काठमाडौं । प्रहरीको केन्द्रीय अनुसन्धान ब्युरो (सीआईबी)ले ललितपुरस्थित देउराली बहुउदेश्यीय सहकारी संस्थाको ठगी प्रकरणको अनुसन्धान सकेको छ । करिब एक महिना अनुसन्धान गरेको सीआईबीले आइतबार फाइल जिल्ला सरकारी वकिल कार्यालय काठमाडौंमा बुझाएको हो ।

संस्थाका अध्यक्ष रविन्द्र चौलागाईंलाई सीआईबीले गत कात्तिक १६ मा नियन्त्रणमा लिएको थियो । त्यसपछि क्रमशः सहकारीका प्रबन्धक दिपक केसी र राजेन्द्र खत्रीलाई समेत पक्राउ गरेको थियो ।

बचतकर्ताले राखेको रकम फिर्ता नदिएको भन्दै सीआईबीमा उजुरी परेपछि उनीहरू पक्राउ परेका थिए । ललितपुरको सातदोबाटो र भक्तपुरको सूर्यविनायकमा रहेको देउराली सहकारीमा जम्मा गर्ने बचतकर्ताको रकम हिनामिना भएको प्रहरीले जनाएको छ ।

सीआईबीका एसएसपी दिनेश आचार्यका अनुसार देउराली सहकारीविरुद्ध ५५३ उजुरी परेको थियो । सोही उजुरीको आधारमा पक्राउ परेका अध्यक्षसहित आरोपीबाट ६५ करोड ७७ लाख रुपैयाँ बिगो असुल गर्नुपर्ने राय दिएको हो ।

सहकारीमा जम्मा भएको कुल दुई अर्ब २० करोड ९२ लाख जोखिममा परेको उनको भनाइ छ । सहकारी ठगी प्रकरणमा अध्यक्ष चौलागाईंसहित १५ जनामाथि ठगी मुद्दा चलाउनु पर्ने राय सीआईबीको छ ।

सहकारीमा अर्बौ बचत भएपनि सबैले उजुरी नदिँदा बिगो ६६ करोड मात्रै माग दाबी गरिएको एसएसपी आचार्यको भनाइ छ ।

तीन करोडको गाडीदेखि १०० भन्दाबढी रोपनी जग्गा खरिद
सहकारीको ठगी प्रकरणबारे एक वर्ष अघिदेखि नै बचतकर्ता प्रहरी कार्यालय धाउन थालेका थिए । तर, सीआईबीले संस्थाका अध्यक्ष ३९ वर्षीय चौलागाईंलाई कात्तिक १६ मा मात्रै फेला पा¥यो ।

उनी सहकारीमा जम्मा गरेको बचतकर्ताको रकमले करिब तीन करोड रुपैयाँ पर्ने टोयटाको सेतो ल्याण्डक्रजुर प्राडोमा कालो सिसा लगाएर प्रहरीलाई छक्काउँदै भागिरहेका थिए । तर, त्यसदिन भने सीआईबीको टोलीले लाजिम्पाटबाट वाग्मती प्रदेश सी २३२९ नम्बरको सोही प्राडोसहित पक्राउ गरेको थियो ।

हाल चौलागाईं सीआईबीको थुनामा छन् । उनको प्राडो भने सीआईबीले एक कुनामा थन्काइदिएका छन् । सीआईबीका एसएसपी आचार्यका अनुसार उनको चलअचल सम्पत्ति सबै रोक्का गरिएको छ ।

सीआईबीका अनुसार करोडौँको उक्त गाडीबाहेक उनले काठमाडौं, ललितपुर, भक्तपुर र काभ्रेमा गरेर १०० रोपनीभन्दा बढी जग्गा खरिद गरेको खुलेको छ । उनी काभ्रेको देउराली गाउँपालिका–६ का स्थायी बासी हुन् ।

उनले आफ्नै गाउँको नामबाट सहकारी स्थापना गरेका थिए ।

प्रहरीको अनुसन्धानबाट देउराली सहकारीको रकम ठगी गर्न उनले आफ्नै श्रीमतीको नाममा डमी कम्पनी समेत खोलेको खुलेको छ ।

यो समाचार पढेर हजुरलाई कस्तो लाग्यो ?

सम्बंधित खबर