सङ्खुवासभा । नौ वर्षीया बालिकालाई बलात्कार गरेको कसुरमा जिल्ला अदालतले खाँदबारी नगरपालिका-२ का ३९ वर्षीय कुमार दर्जीलाई १८ वर्ष कैद सजायको फैसला सुनाएको छ ।
न्यायाधीश टेकनाथ गौतमको ०८० पुस ४ गतेको इजलासले कसुर गरेको ठहर गर्दै १८ वर्ष कैद सजायको फैसला सुनाएको अदालतका श्रेस्तेदार केदारप्रसाद गौतमले बताउनु भयो ।
अदालतको सोही आदेशले कसुरदारलाई ७ लाख रुपियाँ जरिबाना, राहत कोषमा २८ हजार रुपियाँ जम्मा गर्न र पाँच हजार रुपियाँ क्षतिपूर्ति भराउन आदेश भएको श्रेस्तेदार गौतमले बताउनु भयो ।
पीडित बालिकालाई आरोपितले ०७९ जेठ २० गते बलात्कार गरेको आरोपमा पीडित पक्षले आरोपितविरूद्ध ०७९ जेठ २१ गते जिल्ला प्रहरी कार्यालयमा उजुरी दिएको थियो ।
आरोपितलाई प्रहरीले जेठ २३ गते खाँदबारीबाट गिरफ्तार गरी जिल्ला अदालतमा जेठ ३१ गते बलात्कार शीर्षकमा मुद्दा दर्ता गरेको थियो ।
जिल्ला अदालतका न्यायाधीश टेकनाथ गौतमको ०७९ असार २ गतेको आदेशमा आरोपित पुर्पक्षका लागि थुनामा थिए ।
पीडितको स्वास्थ्य परीक्षण जिल्ला अस्पतालमा २०७९ जेठ २४ गते गरिएको थियो ।