असोज १३, मर्चवारी । रुपन्देहीको मर्चवारी गाउँपालिका वडा नं. २, पाण्डेय पिपरहवाँमा नास्ता पसल सञ्चालनमा आएको छ । सोही ठाउँका एक स्थानीय युवा विपतले उक्त नास्ता पसल सञ्चालनमा ल्याएका हुन् । विपतले स्वारोजगारी अन्तर्गत आफै मालिक भइ आफ्नै घुम्ती पसल चलाएको भर्खर २ महिना भएको छ ।
बिगत २ महिनादेखि ताजा स्वादिस्ट नास्ता घरघरमा उपलब्ध हुन थाले पछि स्थानीयहरु खुशी छन् ।यस अघि बिपत रोजगारीको सिलसिलामा भारतको मुम्बइमा काम गर्दै आएका थिए । एक स्टील फ्याक्ट्रीमा काम गरे बापत दिनको ६०० रुपैँया कमाउँदै आएको उनले बताए । उनले भने–कम्पनीमा काम गर्दा यहाँभन्दा धेरै मिहेनत गर्नु पर्दथ्यो । छुट्टी लिएर खेतीपातीको सिजनमा नेपाल स्थित आफ्नो गाउँ आउनु पर्थ्यो ।
बिपतको भनाइ अनुसार उनी बिगत १० वर्षदेखि मुम्बइमा काम गर्दैै आएका थिए ।
अहिले आफ्नै गाउँ, आफ्नै परिवारमा सँगै बसेर दिनको ८०० रुपैँया कमाउँदै छन् । विपतले आफ्नै गाउँमा एक ठेला बनाई सबैको घरदैलोसम्म खाजा नास्ता पुर्याउँछन् । उनले खाजा नास्ता एकदम स्वादिलो र चटपटे बनाउँछन् । स्थानीयहरु भन्छन्—पहिला हामीलाई खाजा नास्ता गर्न पल्लो चोकमा जान पर्थ्यो तर अब घरमै अति नै स्वादिलो नास्ता पाइन्छ ।
