मंसिर १८, रुपन्देही । श्री भूपू सैनिक बहुउद्देश्यीय सहकारी संस्थाद्वारा रक्तदान कार्यक्रम सम्पन्न गरिएको छ । आज तिलोत्तमा–१, ड्राईवरटोल, अमूल्यनगर, रुपन्देहीमा रहेको आफ्नै कार्यालयको प्राङ्गणमा उक्त रक्तदान कार्यक्रम गरिएको हो । ५१ जना रक्तदाताहरुले रक्तदान गरेका थिए । सेवा निवृत्त भएका भारतीय भूपू सैनिकहरु मिलेर स्थापना गरिएको उक्त सहकारीले प्रत्येक वर्ष नियमित रक्तदान गर्दै आएको संस्थाका अध्यक्ष सु.मे. राजकुमार केसीले जानकारी दिनुभयो ।
आर्थिक उन्नतिसँगै सामाजिक विकासमा योगदान दिदै संस्थाले मानव सेवा आश्रम, गौशाला, मैनादेवी अनाथ आश्रम लगायतका क्षेत्रहरुमा बेलाबेलामा सहयोग गर्दै आइरहेको संस्थाका सक्रिय सदस्य श्री तेज बहादुर कार्कीले बताउनुभयो ।
उक्त रक्तदान कार्यक्रमलाई सफल पार्न स्थानीय नवजीवन युवा क्लब र कराङ्गतुङ्ग युवा क्लबका सदस्यहरुले विशेष भूमिका निर्वाह गरेका थिए । उक्त रक्तदान कार्यक्रम क्या. भिमबहादुर भण्डारी, तेज बहादुर कार्की र क्या. हरि बहादुर केसीको संयोजकत्व तथा मेजर जेनी खडकाको प्रमुख आतिथ्यतामा सम्पन्न भएको थियो ।
आगामी दिनहरुमा पनि यस्तै सामाजिक सेवाका कार्यक्रमहरुलाई थप तीव्रता दिने संस्थाका सचिव क्या.कृष्ण बहाुदर अधिकारीले बताउनु भयो ।
