एजेन्सी । टीम इन्डिया २० वर्षपछि एकदिवसीय विश्वकपको फाइनलमा प्रवेश गरेको छ । रोहित शर्माको कप्तानीमा रहेको टोलीले विश्वकप २०२३ को पहिलो सेमिफाइनलमा न्यूजिल्याण्डलाई ७० रनले पराजित गरेको थियो । आज दोस्रो सेमिफाइनलमा दक्षिण अफ्रिका र अष्ट्रेलिया भिड्दैछन् । यो खेल कोलकाताको इडेन गार्डेनमा हुनेछ । यो खेल जित्ने टोलीले फाइनलमा भारतसँग खेल्नेछ । फाइनल खेल १९ नोभेम्बरमा अहमदाबादको नरेन्द्र मोदी स्टेडियममा हुनेछ । अष्ट्रेलियाले एकदिवसीय विश्वकपको उपाधि सर्वाधिक ५ पटक जितेको छ । यस्तो अवस्थामा दक्षिण अफ्रिकाका लागि कंगारु टोलीलाई जित्न सजिलो हुनेछैन ।
पहिलो सेमिफाइनलको कुरा गर्दा भारतका लागि विराट कोहली र श्रेयस अय्यरले शतक प्रहार गरेका थिए । जसका कारण पहिले ब्याटिङ गरेको भारतीय टोलीले ४ विकेट गुमाएर ३ सय ९७ रनको विशाल स्कोर बनाउन सफल भयो । जवाफमा न्युजिल्यान्डले पनि राम्रो लय देखाएको थियो । तर फास्ट बलर मोहम्मद शामीले ७ विकेट लिएर किवी टोलीलाई ३२७ रनमा सीमित गरे । डेरिल मिचेलले टीम इण्डिया विरुद्ध लगातार दोस्रो शतक प्रहार गरे तर त्यो टोलीको जितका लागि अपर्याप्त साबित भयो।
दक्षिण अफ्रिकाको कुरा गर्दा क्विन्टन डी कक उत्कृष्ट लयमा छन् । उनले अहिलेसम्म ४ शतक प्रहार गरिसकेका छन् । यसका अलावा रासी भान डेर डुसेन, एडेन म्याक्राम र हेनरिक क्लासेनले पनि शतक प्रहार गरेका छन् । फास्ट बलर जेरार्ड कोएट्जीले १८ विकेट लिएका छन् भने बायाँ हाते फास्ट बलर मार्को जेन्सनले १७ विकेट लिएका छन् । अष्ट्रेलियाको टोलीको कुरा गर्ने हो भने ग्लेन म्याक्सवेल, डेभिड वार्नर र मिचेल मार्सले २–२ शतक प्रहार गरेका छन् । ट्राभिस हेडले पनि शतकीय पारी खेलेका छन् । कंगारु टोलीका लेग स्पिनर एडम जाम्पा उत्कृष्ट लयमा छन् । उनले हालसम्म २२ विकेट लिएका छन् । यसबाहेक फास्ट बलर जोस हेजलवुडले पनि १२ विकेट लिएका छन् ।
दक्षिण अफ्रिकी टोलीले विश्वकप २०२३ को लिग चरणको खेलमा अष्ट्रेलियालाई पराजित गरेको छ । यस्तो अवस्थामा टिम टेम्बा बाभुमाको कप्तानीमा फेरी त्यही उपलब्धि दोहोर्याउन चाहन्छ । एकदिवसीय विश्वकपको इतिहासमा यी दुई टोलीबीच अहिलेसम्म ७ खेल भइसकेका छन् । दुवैले ३–३ खेल जितेका छन् । विश्वकपको सेमिफाइनलमा अष्ट्रेलिया र दक्षिण अफ्रिकाबीचको यो तेस्रो भिडन्त हो । सन् १९९९ मा खेल बराबरी भएपछि कंगारु टोली फाइनलमा पुग्न सफल भएको थियो । अस्ट्रेलियाले २००७ को सेमिफाइनल जितेको थियो।
