Sun2024 May 19
२०८१ जेठ ०६, आइतबार

सुत्केरीको मृत्यु भएपछि आफन्तले कुटे मेसुलाई

8

१३ मंसिर, बुटवल। बुटवलको सिद्धार्थ बाल तथा महिला अस्पताल आम्दामा सुत्केरी महिलाको मृत्युपछि मृतकका आफन्तले अस्पतालका मेडिकल सुपरिटेन्डेन्ट डा राजेन्द्र बस्यालमाथि हातपात गरेका छन् । गुल्मी सत्यवती गाउँपालिका ठूलो लुम्पेमककी अन्दाजी ३५ वर्षीया भवानी राष्कोटी मगरको प्रसूति  मृत्यु भएपछि आफन्तले डाक्टर बस्यालमाथि कुटपिट गरेका हुन् ।

रास्कोटीलाई सोमबार उपचारका लागि अस्पताल भर्ना गरिएको थियो । त्यही दिन अस्पतालमा उनले शल्यक्रियामार्फत स्वस्थ शिशुलाई जन्म दिएकी थिइन् । तर, मंगलबार ‘पल्मोनरी इम्बोलिजम’का कारण उनको मृत्यु भएको अस्पताल स्रोतले जनाएको छ । रास्कोटीको मृत्युपछि उनका आफन्तहरु फर्किने तरखरमा थिए । त्यही क्रममा बाहिरबाट आएको एक समूहले अस्पताल र चिकित्सकको लापरवाहीले मृत्यु भएको भन्दैं चिकित्सामा संलग्न चिकित्सक विरुद्ध उक्साइएको थियो ।

कुटपिटबाट घाइते भएका बस्यालको लुम्बिनी प्रादेशिक अस्पतालको सघन उपचार कक्षमा उपचार भइरहेको छ । बस्याल खतरामुक्त छन् । सोमबार शल्यक्रियामार्फत पाँच किलोग्रामको बच्चा जन्माएकी भवानीलाई मंगलबार हृदयघात भएर मृत्यु भएको आम्दा अस्पतालका प्रशासन प्रमुख खगेन्द्र क्षेत्रीको दाबी छ ।

भवानीको मृत्युपछि आक्रोशित मृतकका आफन्तले क्षतिपूर्ति बापत ५० लाख माग गरेका छन् । त्यति ठूलो रकम दिने अवस्था नभएको बताएपछि मेसु बस्यालमाथि कुटपिट भएको क्षेत्रीले बताए । मेसु बस्यालमाथि कुटपिटमा संलग्न भएको आरोपमा ७ जनालाई नियन्त्रणमा लिई अनुसन्धान भइरहेको जिल्ला प्रहरी कार्यालय रुपन्देहीका प्रवक्ता डीएसपी मनोहर भट्टले जानकारी दिए ।

मंगलबार घटनापछि बिरामीका आफन्तहरु फर्किने तरखर गरिरहेका बेला बाहिरबाट आएका केही मानिसहरुले चिकित्सामा संलग्न चिकित्सक विरुद्ध उक्साइएको थियो । ‘उनीहरुले ५० लाख रुपैयाँ क्षतिपूर्तिको माग गर्दै अस्पताल तोडफोड तथा मेसुमाथि हातपात गरेका हुन्,’ उनले भने ।

घटनापछि नेपाल चिकित्सक संघ लुम्बिनी अञ्चल शाखाले विज्ञप्ती निकाल्दै वार्तामा बसिरहेको अवस्थामा प्रहरी प्रशासनकै अगाडि डा. बस्यालमाथि भएको कुटपिटको घोर निन्दा गरेको छ । ‘यस नेपाल चिकित्सक संघका आजीवन सदस्य तथा आम्दा नेपाल सिद्धार्थ बाल तथा महिला अस्पतालका मेडिकल सुपरिटेन्डेन्ट डा. राजेन्द्र बस्यालज्यूमाथि वार्तामा बसिरहेको अवस्थामा प्रहरी प्रशासनकै अगाडि विभिन्न समूहहरुले गुण्डागर्दी र दादागिरी शैलीमा कुटपिट गरेकोमा यस चिकित्सक संघ घोर निन्दा एवं भत्र्सना गर्दछ,’ संघका अध्यक्ष डा. डिवी खत्री र महासचिव डा. पोखरेलद्वारा जारी संयुक्त विज्ञप्तीमा छ, ‘कानुनलाई हातमा लिएर मानव अधिकारको जघन्य उल्लंघन गर्दै प्रशासनकै अगाडि यस्तो अपराधिक कार्य हुनु यस समाज र देशका लागि पनि संवेदनशील कुरा हो ।’ विज्ञप्तीमा उल्लेख छ ।

संघले कुटपिटमा संलग्नलाई पक्राउ गरेर तत्काल कानुनअनुसार कारवाही गर्न समेत जोडदार माग गरेको छ ।

यो समाचार पढेर हजुरलाई कस्तो लाग्यो ?

सम्बंधित खबर