त्रिकोणात्मक अन्तर्राष्ट्रिय टी–२० प्रतियोगिताको तेस्रो खेलमा नेपालले हङकङविरुद्ध रनको पहाड खडा गरेको छ ।
कुशल मल्ल र दीपेन्द्रसिंह ऐरीले विस्फोटक ब्याटिङ गर्दै एक सय ४५ रनको साझेदारी गरेपछि नेपालले निर्धारित २० ओभरमा ६ विकेटको क्षतिमा दुई सय १३ रन बनाएको छ । कुशल मल्लले ४१ बलमा नौ छक्का र तीन चौकाको मद्यतमा ९२ रन बनाए । यस्तै, दीपेन्द्रले ३४ बलमा ५७ रनको योगदान दिए । उनले दुई छक्का र ६ चौका प्रहार गरे ।
हङकङले फिल्डिङका निकै कमजोर प्रदर्शन गर्दा नेपाली खेलाडीले पटकपटक मौका पाएका थिए । त्यसअघि नेपालले खेलमा खराब सुरुवात गरेको थियो । दोस्रो ओभरको पहिलो बलमै कुशल भुर्तेललाई गुमाएपछि नेपालले सोमपाल कामीलाई उनको स्थानमा पठाएको थियो । तर, सोमपाल चल्न सकेनन् । १२ बलमा आठ रन बनाई उनी आउट भए भने टिमको स्कोर ४० रन हुँदा २० रन बनाएका आसिफ सेख पनि आउट भए ।
१५ रन थप्दा नेपालले कप्तान रोहित पौडेललाई गुमायो । रोहितले १६बलमा ११ रन मात्र बनाए । तर, त्यसपछि क्रिजमा रहेका कुशल मल्ल र दीपेन्द्रसिंह ऐरीले चौका र छक्का वर्षाउँदै रनको पहाड खडा गरे ।
शृंखलाको यो तेस्रो खेल हो । नेपालले यसअघि हङकङ र युएईलाई पराजित गरेको थियो ।
