नेपाली प्रतिनिधिमण्डलले माथिल्लो अरुण जलविद्युत आयोजनालाई लिएर आगामी देश साझेदारी फ्रेमवर्क र वित्तीय सम्बन्धमा विश्व बैंकसँग बैठक बसेको छ ।
अर्थ सचिव कृष्णहरि पुष्करको नेतृत्वमा नेपाली प्रतिनिधिमण्डलले विश्व बैंकको मुख्यालय वाशिङटन डीसीमा शृङ्खलाबद्ध बैठक बसेको थियो, जसमा मुख्यतया विश्व बैंकले नेपालमा रहेका आयोजनाहरूको हालको पोर्टफोलियो समीक्षा, माथिल्लो अरुण जलविद्युत आयोजनालगायत पाइपलाइन परियोजनाका लागि लगानी गर्ने विषय र अन्य आगामी देश साझेदारी ढाँचामा केन्द्रित रहेको थियो । नेपाली प्रतिनिधिमण्डलमा ऊर्जा सचिव दिनेश घिमिरे, अमेरिकाका लागि नेपाली राजदूत श्रीधर खत्री र अर्थ मन्त्रालयका सहसचिव श्रीकृष्ण नेपाल सहभागी थिए ।
आगामी देश साझेदारी ढाँचाका सम्बन्धमा भएको बैठकमा राजदूत खत्रीले नेपालको सूचना प्रविधि क्षेत्रमा लगानी अभिवृद्धि गर्नुपर्ने आवश्यकता दोहोर्याउँदै दक्षिण एसियाको साझा समृद्धिका लागि क्षेत्रीय सहयोगको महत्त्वबारे प्रकाश पारे ।
