लोकसारथि, माघ २९ । नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’को पछिल्लो अभिव्यक्तिले लोकतन्त्रलाई नै खतरामा पार्ने देखिएको छ। सत्ता गुमाउनु परेको पीडा प्रचण्डमा झल्किन थालेको विश्लेषण भइरहेका बेला उहाँका भनाइहरूले संसदीय व्यवस्थाप्रति नै प्रश्न उठाएको आकलन गरिएको छ।
सत्तामा रहँदा निष्क्रिय रहेको जातीय तथा क्षेत्रीय संगठनलाई पुनर्जीवित गर्दै प्रचण्डले राजनीतिक अस्थिरता सिर्जना गर्ने प्रयास गरिरहेको आरोप लगाइएको छ। एमाले र कांग्रेसको संयुक्त सरकार गठन भएपछि जातीय तथा क्षेत्रीय नारालाई अघि सारेर आफ्नो राजनीतिक अभीष्ट पूरा गर्न खोजेको विश्लेषण गरिएको छ।
प्रधानमन्त्री केपी शर्मा ओलीलाई ‘भ्रष्ट र जाली’ भन्दै सार्वजनिक मञ्चबाट आक्रमण गर्दै हिँडिरहेका प्रचण्डको भनाइहरूकै कारण लोकतन्त्रलाई कमजोर बनाउने तत्वहरूलाई मलजल पुगेको विश्लेषण गरिँदैछ। एमाले महासचिव शंकर पोखरेलले प्रचण्डको पछिल्लो अभिव्यक्तिलाई सत्ताबाट बाहिरिनु परेको पीडाको रूपमा व्याख्या गरेका छन्।
यस्तै, नेपाली कांग्रेसका महामन्त्री गगन थापाले प्रमुख प्रतिपक्षी दलका नेताले के बोल्ने र के नबोल्ने भन्ने ज्ञान हुनुपर्ने उल्लेख गर्दै प्रचण्डका अभिव्यक्तिले लोकतन्त्रलाई हल्का बनाउने प्रयास भइरहेको आरोप लगाएका छन्।
देश दौडाहामा रहेका प्रचण्डले आफ्ना विगतका निर्णयको आत्मसमीक्षा गर्नुपर्नेमा अरूमाथि दोष थोपरेर आफूलाई निर्दोष देखाउन खोजेको टिप्पणी राजनीतिक वृत्तमा भइरहेको छ। वर्तमान सरकारले जनअपेक्षाअनुसार काम गर्न नसकेको गुनासो भइरहेका बेला प्रचण्डका अभिव्यक्तिहरूले जनतामा झन् निराशा थप्ने संकेत देखिएको छ।
विश्लेषकहरूले प्रतिपक्षको भूमिकालाई प्रभावकारी बनाउनु पर्ने नेताहरूले सत्ता केन्द्रित अभिव्यक्तिहरू दिँदा राजनीतिक अवस्था झन् जटिल बन्दै गएको चेतावनी दिएका छन्।
