काठमाडौँ । अमेरिकाको ट्रम्प प्रशासनले अवैध रुपमा बसिरहेका २०५ भारतीयलाई फिर्ता पठाएको छ । डोनाल्ड ट्रम्पले दोस्रो कार्यकाल राष्ट्रपतिको कुर्सी सम्हालेको पहिलो दिनमै अवैध रुपमा बसिरहेका आप्रवासीलाई फिर्ता पठाउने निर्णय गरेको थियो ।
सो अनुसार २०५ भारतीय आप्रवासीलाई फिर्ता पठाएको छ । रोयटर्सका अनुसार युएस एयरफोर्सको सी–१७ ट्रान्सपोर्ट एयरक्राफ्ट अवैध आप्रवासी लिएर भारतको अमृतसरका लागि उडिसकेको छ ।
यो प्रक्रियामा भारतसमेत सामेल भएको छ । ट्रम्पले अमेरिकी इतिहासकै सबैभन्दा ठूलो डिपोर्ट गर्ने वाचा गरेका थिए ।
इमिग्रेशन एन्ड कस्टम्स इन्फोर्समेनट (आईसीई) का अनुसार १५ लाख अवैध आप्रवासीको विवरण तयारी अवस्थामा रहेको छ ।
तीमध्ये १८ हजार भारतीय हुन् । यसरी लुक्नेमा सयौँ नेपालीसमेत रहेका छन् ।
यसअघि ट्रम्पले ११ दिनमा १७ सय अवैध आप्रवासी भारतीयलाई हिरासतमा लिइसकेको छ । विश्वभरका गरी २५ हजार भन्दा बढीलाई प्रशासनले पक्रिएको छ ।
आईसीईले १२ राज्यमा छापा मारेको थियो ।
सन् २०२२ मा प्यू रिसर्च सेन्टरले सार्वजनिक गरेको तथ्याङ्कअनुसार अमेरिकामा १ करोड १ लाख आप्रवासी अवैध रुपले बसिरहेका छन् ।
सबैभन्दा बढी सन् २००७ मा १ करोड २२ लाख रहेका थिए ।
सन् १९९० मा यो संख्या ३५ लाख रहेको थियो ।
सबैभन्दा बढी मेक्सिकोका ४१ लाख अवैध नागरिक रहेका छन् । त्यस्तै एल साल्भाडोरका ८ लाख तथा भारतका ७ लाख २५ हजार रहेका छन् ।
त्यस्तै ग्वाटेमालाका ७ लाख होन्डुरसका साढे ५ लाख रहेका छन् ।
