लोकसारथि संवाददाता, बुटवल।

काठमाडौंबाट डोल्पातर्फ जाँदै गरेका यात्रुहरू भारी हिमपातका कारण बीच बाटोमै अलपत्र परेका छन् । मध्यपहाडी लोकमार्गअन्तर्गत रुकुम पूर्व–बागलुङ खण्डमा परेको हिमपातका कारण दर्जनौँ सवारी साधन र तीमा सवार यात्रुहरू रोकिएका हुन् ।

उक्त सडकखण्डमा अचानक परेको हिमपात र चिसोका कारण यात्रुहरूले ठूलो सास्ती भोग्नु परेको छ । अत्यधिक चिसोका कारण केही यात्रुको स्वास्थ्यमा समेत समस्या देखिन थालेको बताइएको छ । यात्रुहरू नजिकैका साना पसलमा आगो तापेर बस्न बाध्य छन् भने केही असहाय र अशक्त यात्रु भने गाडीमै बस्नुपरेको अवस्था छ । कतिपय स्थानमा खाना र न्यानोको समेत अभाव रहेको यात्रुहरूको गुनासो छ ।

घण्टौँसम्म पनि उद्धारका लागि सम्बन्धित निकायबाट प्रभावकारी पहल नभएको भन्दै यात्रुहरूले असन्तुष्टि जनाएका छन् । उनीहरूले तत्काल उद्धार, खानपिनको व्यवस्था, न्यानो कपडा तथा स्वास्थ्य सहयोगको माग गरेका छन् । हिउँमा फसेका अधिकांश यात्रुहरू डोल्पाका बासिन्दा रहेको जनाइएको छ ।

यसैबीच, रुकुम पूर्व प्रशासनका अनुसार रुकुम पूर्व क्षेत्रमा अलपत्र परेका सवारी साधन र यात्रुहरूलाई बुधबार नै सुरक्षाकर्मी र स्थानीय तहको समन्वयमा उद्धार गरी बागलुङतर्फ पठाइएको थियो । हिउँ पन्छाउन डोजर प्रयोग गरी बाटो आंशिक रूपमा खुलाइएको र सरकारी सवारी साधनमार्फत यात्रुहरूलाई रुकुम पूर्वको सिमानासम्म सुरक्षित रूपमा पुर्‍याइएको प्रशासनको भनाइ छ । रुकुम पूर्व पार गरिसकेका यात्रुहरू भने बागलुङ खण्डमा पुनः रोकिएको अवस्था देखिएको छ ।

बागलुङ प्रशासनले पनि हिमपात धेरै बाक्लो नभए पनि सडक अत्यन्त चिप्लो भएका कारण केही सवारी साधन बीच बाटोमै रोकिएको जनाएको छ । हिउँ पन्छाएर सडक खुलाउने प्रयास जारी रहेको र मौसम अनुकूल भए आजै सडक पूर्ण रूपमा खुलाइ यात्रुहरूलाई गन्तव्यतर्फ पठाइने तयारी भइरहेको जानकारी दिइएको छ ।

स्थानीय प्रशासनका अनुसार दुई जिल्लाबीच निरन्तर समन्वय भइरहेको छ भने यात्रुको सुरक्षा र सहज आवागमनका लागि आवश्यक सबै उपाय अपनाइने जनाइएको छ ।