लोकसारथि, २२ चैत । रुपन्देहीको सैनामैना नगरपालिका–१ बनकट्टामा विङगर र बोलेरो जिप एक आपसमा ठोकिँदा ८ जना यात्रु घाइते भएका छन्।

सालझण्डीबाट बुटवलतर्फ जाँदै गरेको पश्चिम नेपाल बस व्यवसायी संघको लु १ ज ४२८९ नम्बरको विङगर र बुटवलबाट पश्चिमतर्फ आउँदै गरेको लु १ च ६७४७ नम्बरको फलफूल बोकेको बोलेरो जिप आपसमा ठोकिँदा दुर्घटना भएको इलाका प्रहरी कार्यालय रन्यौरा मुर्गियाले जानकारी दिएको छ।

इलाका प्रहरी कार्यालय रन्यौराका प्रहरी निरीक्षक आदित्य राज विष्टका अनुसार दुर्घटनामा परेका ८ जनामध्ये ६ जना सामान्य घाइते भएका छन् भने २ जनाको अवस्था गम्भीर रहेको छ।

घाइते सबैको उपचारका लागि लुम्बिनी प्रादेशिक अस्पताल बुटवल पठाइएको र दुर्घटनाबारे थप अनुसन्धान भइरहेको प्रहरी निरीक्षक विष्टले बताए।

स्थानीय प्रत्यक्षदर्शीका अनुसार तीव्र गतिका कारण दुर्घटना भएको हुनसक्ने आशंका गरिएको छ। यस दुर्घटनाले पुनः सवारीसाधनको गति नियन्त्रण र सडक सुरक्षाका सवालमा गम्भीर ध्यान दिनुपर्ने देखाएको छ।

—लोकसारथि