दमोह:  मध्य प्रदेशको दमोह जिल्लामा रहेको एक अस्पतालमा कार्यरत ‘फर्जी’ हृदय रोग विशेषज्ञ (कार्डियोलोजिस्ट) नरेन्द्र जोन कैमलाई सोमबार उत्तर प्रदेशको प्रयागराजबाट पक्राउ गरिएको छ। प्रहरी अधिकारीले यसबारे जानकारी दिएका छन्।

दमोह जिल्लाको एक मिशनरी अस्पतालमा सात जना बिरामीको ज्यान गएको घटनासँग उनलाई जोडिएको बताइएको छ। दमोह जिल्लाका प्रमुख स्वास्थ्य अधिकारी (सीएमएचओ) एम.के. जैनको उजुरीका आधारमा नक्कली मेडिकल डिग्री प्रयोग गरेर बिरामीको उपचार गरेको आरोपमा आइतबार मध्यराति नरेन्द्र जोन विरुद्ध ठगी र जालसाजीको मुद्दा दर्ता गरिएको थियो।

अदालतमा पेश गरिने

दमोहका प्रहरी प्रमुख (एसपी) श्रुत कीर्ति सोमवंशीका अनुसार आरोपी डाक्टर नरेन्द्र जोन कैमलाई प्रयागराजबाट पक्राउ गरिएको हो। “हाम्रो टोलीले छापा मारेर उनलाई नियन्त्रणमा लिएको हो र उनलाई दमोह ल्याउने तयारी भइरहेको छ,” एसपी सोमवंशीले बताए। उनले थपे, “आरोपीलाई पछि अदालतमा पेश गरिनेछ। सीएमएचओले उजुरीमा उठाएका प्रश्नहरूको उत्तर पत्ता लगाउन पूरक सोधपुछ गरिनेछ।”

अहिलेसम्मको अनुसन्धान र रिपोर्टहरू

प्रारम्भिक अनुसन्धान अनुसार, आरोपी डाक्टरको प्रमाणपत्र नक्कली रहेको पुष्टि भएको प्रहरीले जनाएको छ। उनलाई ठगी तथा जालसाजीको आरोपमा पक्राउ गरिएको हो। बिरामीको मृत्युसम्बन्धी अनुसन्धान जबलपुर मेडिकल कलेजलाई जिम्मा दिइएको छ। मेडिकल कलेजको रिपोर्टको आधारमा थप कानुनी प्रक्रिया अघि बढाइनेछ।

सरकारी योजना अन्तर्गत फण्ड लिने अस्पताल

यो मिशनरी अस्पतालले आयुष्मान भारत योजना अन्तर्गत सरकारबाट फण्ड पनि लिइरहेको थियो। यसै सन्दर्भमा, राष्ट्रिय मानव अधिकार आयोग (NHRC) का सदस्य प्रियांक कनोंगोले उक्त अस्पतालमा सरकारी धनको दुरुपयोग र बिरामीको जीवनसँग खेलवाड भएको गम्भीर आरोप लगाएका छन्।

अनुसन्धान निकायहरूले अस्पतालका सबै कागजात नियन्त्रणमा लिएका छन्। ती कागजातहरूको छानबिन गर्दा आरोपीले बेलायती डाक्टरको नक्कली प्रमाणपत्र पेश गरेको पाइयो। दमोहका प्रमुख जिल्ला अधिकारी सुधीर कोचर र प्रहरी प्रमुख अभिषेक तिवारीका अनुसार घटनाको गम्भीर अनुसन्धान भइरहेको छ र दोषीमाथि कडा कारबाही गरिनेछ।