लोकसारथि संवाददाता, काठमाडौं ।

सरकारले यस वर्ष पनि बालिका तथा किशोरीहरूलाई पाठेघरको मुखको क्यान्सर रोकथामका लागि एचपीभी (ह्युमन पापिलोमा भाइरस) खोप लगाउने राष्ट्रिय अभियान सञ्चालन गर्ने भएको छ । स्वास्थ्य सेवा विभागअन्तर्गत बालस्वास्थ्य तथा खोप शाखाले देशभर खोप अभियानको तयारी तीव्र पारेको छ ।

बालस्वास्थ्य तथा खोप शाखाका प्रमुख डा. अभियान गौतमका अनुसार, खोप अभियान यही महिनाको तेस्रो सातादेखि देशभर सुरु हुनेछ । उहाँले फागुनको पहिलो सातासम्म सबै लक्षित बालिकालाई खोप दिइसक्ने लक्ष्य राखिएको जानकारी दिनुभयो ।
“अहिले स्वास्थ्यकर्मीहरूलाई आवश्यक तालिम दिइरहेका छौं । सबै तयारी समयमै पूरा हुन्छ,” डा. गौतमले भन्नुभयो ।

गत वर्ष सरकारले कक्षा ६ देखि १० सम्म अध्ययनरत तथा विद्यालय बाहिर रहेका १० देखि १४ वर्ष उमेर समूहका करिब १७ लाख बालिकालाई एचपीभी खोप लगाएको थियो । सो अभियानमा छुटेका बालिकाहरूलाई यस वर्ष समेटिने जनाइएको छ । चालु वर्षमा करिब ३ लाख ५० हजार बालिकालाई खोप उपलब्ध गराउने लक्ष्य सरकारले लिएको छ ।

स्वास्थ्य मन्त्रालयका अनुसार, यस अभियानमा प्रयोग हुने खोप चीनबाट आयात गरिएको हो र यसमा भ्याक्सिन र खोपका लागि ग्लोबल एलायन्स (गाभी) को सहयोग रहेको छ ।

नेपालमा पाठेघरको मुखको क्यान्सर महिलामा देखिने प्रमुख क्यान्सरमध्ये एक हो । तथ्याङ्कअनुसार नेपालमा हरेक वर्ष औसतमा चार महिलाको मृत्यु यसै क्यान्सरका कारण हुने गर्दछ । यसको मुख्य कारण ह्युमन पापिलोमा भाइरस संक्रमण भएकाले एचपीभी खोपलाई अत्यन्त प्रभावकारी र आवश्यक मानिएको छ ।

यस वर्षको अभियानअन्तर्गत कक्षा ६ मा भर्ना भएका छात्रा, विद्यालयमा नपरेका १० वर्ष उमेर समूहका बालिका, साथै कक्षा ६ मा अध्ययनरत ११ देखि १२ वर्ष उमेरका छात्राहरूले पनि खोप प्राप्त गर्नेछन् ।

स्वास्थ्य विज्ञहरूका अनुसार समयमै एचपीभी खोप लगाउन सके पाठेघरको मुखको क्यान्सरको जोखिम उल्लेखनीय रूपमा घटाउन सकिने भएकाले अभिभावकलाई आफ्ना छोरीहरूलाई खोप कार्यक्रममा अनिवार्य सहभागी गराउन आग्रह गरिएको छ ।