प्रधानमन्त्री पुष्पकमल दाहाल ‘प्रचण्ड’को निमन्त्रणामा संयुक्त राष्ट्रसङ्घका महासचिव एन्टोनियो गुटेरेस नेपालको चारदिने औपचारिक भ्रमणका क्रममा काठमाडौं आएका छन् ।

त्रिभुवन अन्तर्राष्ट्रिय विमानस्थलमा संयुक्त राष्ट्रसंघका महासचिवलाई परराष्ट्रमन्त्री नारायण प्रकाश साउदले स्वागत गरेका थिए । भ्रमणको पहिलो दिन आइतबार महासचिव गुटेरेसले राष्ट्रपति कार्यालयमा राष्ट्रपति रामचन्द्र पौडेल र प्रधानमन्त्री पुष्पकमल दाहाल ‘प्रचण्ड’सँग प्रधानमन्त्री कार्यालय, परराष्ट्र मन्त्रालयमा शिष्टाचार भेट गर्ने कार्यक्रम छ । मामिलाले बताए ।

महासचिवले नेपाली कांग्रेसका सभापति शेरबहादुर देउवा र नेकपा एमालेका अध्यक्ष केपी शर्मा ओलीसँग नयाँ बानेश्वरस्थित संघीय संसद भवनमा छुट्टाछुट्टै भेट गर्नेछन् । त्यसैगरी गुटेरेसले उपप्रधानमन्त्रीद्वय पूर्णबहादुर खड्का र नारायणकाजी श्रेष्ठसँग पनि छुट्टाछुट्टै भेटवार्ता गर्ने कार्यक्रम छ । भेटघाटपछि उनले ऐतिहासिक तथा पुरातात्विक सम्पदाको रुपमा रहेको पाटन दरबार स्क्वायरको अवलोकन गर्नेछन् ।

प्रधानमन्त्री दाहालले आइतबार साँझ महासचिव गुटेरेसको सम्मानमा रात्रिभोज आयोजना गर्ने छन् । भ्रमणका क्रममा महासचिव सोमबार नाम्चे, पोखरा, अन्नपूर्ण आधार शिविर र लुम्बिनी जानेछन् । उनले मंगलबार अपराह्न ४ बजे संघीय संसदको संयुक्त बैठकलाई सम्बोधन गर्ने कार्यक्रम रहेको संसद सचिवालयले जनाएको छ ।

सन् २०१७ मा संयुक्त राष्ट्रसङ्घको महासचिवको जिम्मेवारी सम्हालेपछि पहिलोपटक नेपाल भ्रमणमा आउन लागेका गुटेरेससँग शान्ति प्रक्रिया, दिगो विकास र जलवायु परिवर्तनका विषयमा छलफल हुने परराष्ट्र मन्त्रालयले जनाएको छ ।