लोकसारथि, ३ फाल्गुन । विक्की कौशल अभिनित बहुप्रतीक्षित चलचित्र ‘छावा’ हिजो भ्यालेन्टाइन डेको अवसरमा हलमा प्रदर्शनमा आएको थियो। फ्यानहरूको अत्यधिक प्रतिक्षा रहेको यो फिल्म समीक्षकहरूबाट सकारात्मक प्रतिक्रिया पाइरहेको छ। फिल्म हेरेका दर्शकहरूले निकै तारिफ गरिरहेका छन्, जसका कारण ‘छावा’को व्यापारमा उल्लेखनीय वृद्धि देखिएको छ।

ओपनिङ डेमा बक्स अफिसमा बलियो पकड

‘छावा’ले प्रदर्शनको पहिलो दिनमै बक्स अफिसमा नयाँ रेकर्ड कायम गरेको छ। प्रारम्भिक रिपोर्टअनुसार, फिल्मले पहिलो दिनमै ३०-३२ करोड भारतीय रुपैयाँको कमाई गरेको छ। यदि आधिकारिक तथ्यांक यही आसपास रह्यो भने, यो वर्षको पहिलो ब्लकबस्टर फिल्म बन्ने सम्भावना बलियो देखिएको छ।

७ फिल्मको ओपनिङ डे रेकर्ड तोड्यो

यस वर्ष रिलिज भएका अन्य बलिउड तथा दक्षिण भारतीय फिल्महरूको ओपनिङ डे कमाईलाई ‘छावा’ले सहजै पछाडि पारेको छ। यसअघि रिलीज भएका ‘इमर्जेन्सी’ (२.५ करोड), ‘आजाद’ (१.५ करोड), ‘स्काई फोर्स’ (१२.२५ करोड), ‘देवा’ (५.५ करोड), ‘लभयापा’ (१.२५ करोड), ‘ब्याडअस रविकुमार’ (२.७५ करोड), र दक्षिण भारतीय फिल्म ‘ठण्डेल’ (११.५ करोड) को ओपनिङ डे कलेक्सनभन्दा ‘छावा’को पहिलो दिनको व्यापार धेरै माथि रहेको छ।

अजित कुमारको ‘विदमुयार्ची’ को रेकर्ड तोड्ने अनुमान

बक्स अफिस विश्लेषकहरूका अनुसार, ‘छावा’को ओपनिङ डे कमाई अजित कुमार अभिनित ‘विदमुयार्ची’ (२६ करोड) को ओपनिङ कलेक्सनलाई पनि पार गर्न सक्ने अनुमान गरिएको छ। अग्रिम बुकिङको आधारमा ‘छावा’ले प्रदर्शन हुनुअघि नै उल्लेखनीय आम्दानी गरिसकेको थियो।

फिल्मको मुख्य विशेषता

लक्ष्मण उतेकर निर्देशित ‘छावा’ छत्रपति शिवाजी महाराजका छोरा छत्रपति संभाजी महाराज को जीवनीमा आधारित ऐतिहासिक चलचित्र हो। यसमा विक्की कौशलले छत्रपति संभाजी महाराज, रश्मिका मन्डन्नाले उनकी पत्नी, र अक्षय खन्नाले औरंगजेब को भूमिका निर्वाह गरेका छन्। फिल्ममा विनीत कुमार सिंह र आशुतोष राणा पनि प्रमुख भूमिकामा छन्।

करिब १३० करोडको बजेट मा निर्माण भएको यो फिल्म समीक्षकहरूको प्रशंसा पाउन सफल भइरहेको छ। यदि व्यापारको यही क्रम जारी रह्यो भने, ‘छावा’ वर्ष २०२४ को सर्वाधिक सफल चलचित्र बन्न सक्ने अनुमान गरिएको छ।

‘छावा’ प्रदर्शन भएको पहिलो दिनमै दर्शकहरूको मन जित्न सफल भएको छ। समीक्षकहरूद्वारा सकारात्मक समीक्षा प्राप्त गर्दै, बक्स अफिसमा पनि उत्कृष्ट व्यापार गरिरहेको छ। अब आगामी दिनमा यो फिल्मले कस्तो प्रदर्शन गर्छ, त्यसतर्फ सबैको ध्यान गएको छ।