लोकसारथि संवाददाता, काठमाडौं ।

राजसंस्था पुनर्स्थापना, हिन्दु राष्ट्रको पुनःघोषणा र संघीयता खारेजको माग राख्दै संयुक्त जनआन्दोलन समितिको अगुवाइमा राजावादी समूहले सुरु गरेको आन्दोलन आज चौथो दिनमा प्रवेश गरेको छ। आइतबार राजधानीको माइतीघर मण्डलामा उनीहरूले शान्तिपूर्ण ब्यानर प्रदर्शन गर्ने जनाइएको छ।

शुक्रबारदेखि सुरु भएको यो अनिश्चितकालीन आन्दोलनमा राप्रपा, राप्रपा नेपाललगायतका हिन्दुवादी तथा राजावादी संघसंस्थाहरू सहभागी छन्। आन्दोलनको पहिलो दिन प्रधानमन्त्री निवास बालुवाटारअगाडि प्रदर्शन गरेर सरकारको ध्यानाकर्षण गराइएको थियो।

आन्दोलनकारीहरूको मुख्य मागहरूमा—

-वि.सं. २०६३ पछि खारेज गरिएको राजसंस्थाको पुनःस्थापना,

-धर्मनिरपेक्षताको निर्णय उल्टाएर नेपाललाई पुनः हिन्दु राष्ट्र घोषणा,

-संघीयता खारेज गरी एकात्मक शासन व्यवस्था पुनःस्थापना, जस्ता विषयहरू रहेका छन्।

संयुक्त जनआन्दोलन समितिका अनुसार जेठ १५ देखि सुरु गरिएको यो आन्दोलन शान्तिपूर्ण भए पनि निरन्तर जारी रहने छ। आन्दोलनकारीहरूले देशको मूल पहिचान मेटाउन खोजिएको भन्दै सशक्त प्रतिरोध आवश्यक भएको बताएका छन्।

राजावादी पक्षको दाबी अनुसार धर्म, संस्कृति, परम्परा र राष्ट्रिय एकताको प्रतीकका रूपमा रहेको राजसंस्थाको खारेजी र हिन्दु राष्ट्रको अन्त्यले देशमा अस्थिरता र असमञ्जस्यता फैलिएको छ।

यसैबीच, राजनीतिक विश्लेषकहरूले आन्दोलनको बढ्दो गतिविधिप्रति सरकार गम्भीर नबने चर्का परिणाम आउन सक्ने चेतावनी दिएका छन्। माइतीघर क्षेत्रको प्रदर्शनलाई लिएर सुरक्षा सतर्कता पनि बढाइएको छ।

सरकारले भने हालसम्म आन्दोलनबारे कुनै स्पष्ट प्रतिक्रिया दिएको छैन। यद्यपि नागरिक समाजका केही वर्गले आन्दोलनको मागलाई ऐतिहासिक समीक्षा र संवादमार्फत सम्बोधन गर्नुपर्ने धारणा सार्वजनिक गरेका छन्।

राजनीतिक असहमति समाधान गर्न संवाद र समन्वयलाई प्रमुख प्राथमिकता दिनुपर्ने बेला आएको जनस्तरको अपेक्षा रहँदै आएको छ। आंदोलन शान्तिपूर्ण हुने जनाए तापनि यदि मागहरू सुनुवाइ भएनन् भने आन्दोलन चर्किन सक्ने आँकलन गरिएको छ।