एजेन्सी । इरानले इजरायलको केन्द्रीय तथा उत्तरी क्षेत्रमा बदला स्वरूप दुई ठूला लहरमा लगभग १०० वटा मिसाइलहरू प्रक्षेपण गरेको छ, जसका कारण गम्भीर क्षति पुगेको र ४१ जना घाइते भएको इजरायली सेना र राष्ट्रिय आपतकालीन सेवा मगेन डेविड अदोम (MDA) ले जानकारी दिएको छ।

मिसाइल आक्रमणपछि इजरायलभर एयर रेड साइरनहरू बज्न थाले, र राजधानी यरुशलेमभरि विस्फोटका आवाजहरू गुन्जिए। इजरायली टिभी च्यानलहरूले तेल अवीवमा धुवाँको मुस्लो आकाशतर्फ उडेको दृश्य देखाएका छन्।

MDA का अनुसार, दुई व्यक्तिको अवस्था गम्भीर, दुईको मध्यम, चारको हल्का–मध्यम, बाँकी अन्य व्यक्तिहरूको सामान्य चोट, मानसिक आघात तथा आतङ्कका कारण आक्रान्त अवस्था (panic attacks) मा रहेको जनाइएको छ।

इरानी इस्लामिक रिभोलुसनरी गार्ड कोर्प्स (IRGC) को आधिकारिक वक्तव्य:

“यस विहान इस्लामिक गणतन्त्र इरानको भूभागमा गरिएको आक्रमण र आपराधिक बर्बरतापूर्ण हमला, जसमा केही वरिष्ठ सैन्य कमाण्डरहरू, प्रसिद्ध वैज्ञानिकहरू, निर्दोष नागरिकहरू तथा विशेषगरी निर्दोष बालबालिकाहरूको सहादत भएको थियो — त्यसको प्रतिक्रिया स्वरूप, इरानी जनताको रक्षात्मक र आक्रामक हातको रूपमा IRGC ले शक्तिशाली र सटीक बदला कारवाही सुरु गरेको हो।

ईश्वरको शक्तिमा विश्वास, हाम्रो महान नेता (सर्वोच्च कमाण्डर) को बुद्धिमानीपूर्ण नेतृत्व, र इरानी जनताको एकताबद्ध माग तथा समर्थनका आधारमा, ‘साँचो प्रतिज्ञा ३’ नामक अभियान अन्तर्गत, अवैध ज़ायोनिस्ट शासनका सैन्य केन्द्रहरू, वायुसेनाका अड्डाहरू लगायत दर्जनौं लक्ष्यहरूमा आक्रमण गरिएको हो।

यो कारवाही ईद–अल–ग़दीरको पवित्र रातमा ‘या अली इब्न अबी तालिब (अ.स.)’ को नारा लगाउँदै सुरु गरिएको हो। यस अभियानका थप विवरणहरू इरानी जनतालाई अर्को आधिकारिक वक्तव्यमार्फत सार्वजनिक गरिनेछ।”

यो हमला हालै इरानमा भएको इजरायली कारवाहीको सशक्त बदला भएको इरानले स्पष्ट पारेको छ। स्थिति अझै संवेदनशील छ र थप भिडन्त वा कूटनीतिक प्रतिक्रिया आउन सक्ने अनुमान गरिएको छ।