काठमाडौँ – सामाजिक सञ्जाल बन्द, राजनीतिक भ्रष्टाचार र शासकीय अव्यवस्थाविरुद्ध सुरु भएको ‘जेनजी’ युवाहरूको आन्दोलन मंगलबार अझ उग्र बन्दै गएको छ। आक्रोशित प्रदर्शनकारीहरूले माइतीघर–भद्रकाली सडकछेउमा रहेको सरकारी वकिलको कार्यालयमा आगजनी गरेका छन्।

सोमबारको प्रदर्शनमा प्रहरीले अत्यधिक बल प्रयोग गरेपछि आन्दोलन थप भड्किएको हो। मंगलबार बिहानैदेखि युवाहरूले सरकारी भवन, मन्त्री निवास, नेताहरूको घर र दलका कार्यालयहरूमा तोडफोड र आगजनी गरिरहेका छन्।

यस क्रममा प्रदर्शनकारीहरूले मुलुकको प्रमुख प्रशासनिक केन्द्र सिंहदरबार र सर्वोच्च अदालतमा समेत आगो लगाएका छन्। भीड नियन्त्रणका लागि प्रहरीले गोली प्रहार गर्दा मंगलबार मात्रै कालिमाटीमा दुई युवाको ज्यान गएको छ।

यसअघि सोमबार भएको गोलीकाण्डमा १९ जनाको मृत्यु भइसकेको थियो। मंगलबारको घटनासँगै मृतकको संख्या २१ पुगेको छ भने सयौँ घाइते भएको बताइएको छ।

सडकमा युवाहरूको भीड झन् बढ्दै गएपछि राजधानीमा स्थिति नियन्त्रणबाहिर गएको सुरक्षास्रोतहरूले जनाएका छन्।