काठमाडौँ – सोमबारदेखि सुरु भएको ‘जेनजी’ आन्दोलन मंगलबार निर्णायक मोडमा पुगेको छ। आक्रोशित प्रदर्शनकारीहरूले राज्यका तीन प्रमुख अङ्ग– व्यवस्थापिका, कार्यपालिका र न्यायपालिकाका भवनहरू नियन्त्रणमा लिएर आगजनी तथा तोडफोड गरेका छन्।

संसद् भवन, सिंहदरबारस्थित प्रधानमन्त्री तथा मन्त्रिपरिषद्को कार्यालय र सर्वोच्च अदालतलगायतका संरचनामा आन्दोलनकारीहरूले आगो लगाएका हुन्। प्रमुख तीनै अङ्गका केन्द्रमा भएको आक्रमणपछि मुलुक अभूतपूर्व राजनीतिक संकटतर्फ धकेलिएको विश्लेषण गरिएको छ।

सुरक्षा निकाय र प्रशासनिक निकायका प्रमुखहरूले मंगलबार संयुक्त विज्ञप्ति जारी गर्दै स्थिति आफ्नो नियन्त्रणबाहिर पुगेको स्वीकार गरेका छन्। विज्ञप्तिमा आन्दोलनलाई शान्तिपूर्ण समाधान गर्न सबै पक्षसँग अपिल गरिएको छ।

आन्दोलनकारीहरूले सामाजिक सञ्जाल प्रतिबन्ध र राजनीतिक भ्रष्टाचारविरुद्ध उठाएका माग तत्काल सम्बोधन नगरे मुलुक अझ गम्भीर संकटमा धकेलिन सक्ने चेतावनी विश्लेषकहरूले दिएका छन्।