बुटवल । आजको युग प्रविधिको युग हो । प्रविधिको सहयोगबाट मानिसले कैयौँ सुविधा र फाइदाहरु प्राप्त गरेको छ । प्रविधिको सदुपयोगले मानिसलाई लाभान्वित बनाएको छ भने त्यसको दुरपयोगबाट अनेकौँ अपराधिक गिरोहहरुले फाइदा उठाएका छन् । प्रविधिको दुरुपयोग गरी विभिन्न ठगी कार्य गर्नु हिजोआज सामान्य घटना जस्तै भइसकेको छ ।

आज अनलाइन कारोबार कुनै पनि चिजवस्तु खरिद बिक्री गर्ने सशक्त माध्यम बनेको छ । जहाँ अनलाइन कारोबारले सबैको विश्वास जितेको भए पनि यसलाई माध्यम बनाएर ठगी गर्ने गिरोहका कारण प्रयोगकर्तालाई अनेक झन्झट र तनाव सिर्जना भएको छ । व्यक्तिका फेसबुक अकाउन्ट, ट्वीटर, टिकटक, मेसेन्जर, वाट्सएप, बैंक अकाउन्ट, इमो लगायतका नवीन प्राविधिक साधनहरु ह्याकरका लागि वरदान साबित भएका छन् । कैयौँ व्यक्तिहरु ठगिने, विभिन्न कानुनी फन्दामा पर्ने, महत्वपूर्ण समय खेर जाने र शारीरिक तथा मानसिक यातनाको शिकार हुने जस्ता जटिलताहरुले प्रविधिमाथिको अविश्वसनीयतालाई बल प्रदान गरेको छ ।

प्रविधि प्रयोगकर्ताको विश्वास गुम्ने यस्तै ठगीको एउटा अर्काे घटना घटेको छ । काठमाडौँ त्रिभुवन विश्वविद्यालयका प्रोफेसर डाक्टर रामचन्द्र पौडेललगायत अन्य व्यक्तिहरु वाट्सएप अकाउन्ट ह्याक गर्ने ह्याकरबाट ठगिएका छन् । एका बिहानै पौडेलको मोबाइलमा अत्यन्त विश्वासिला पात्रको वाट्सएपबाट मेसेज पठाइन्छ । उक्त मेसेज खोलेर हेर्दा मलाई पैँतिस हजार रुपैयाँ इमर्जेन्सी आवश्यक परेकाले तुरुन्त पठाइदिनुपर्‍यो सर भनी अनुरोध गरिएको हुन्छ । त्यसपछि पौडेलले सम्बन्धित व्यक्तिलाई फोन सम्पर्क गर्न खोज्छन् । उताबाट फोन व्यस्त भइरहन्छ । अनेकौँ पटकको प्रयासपछि पनि फोन सम्पर्क हुन नसक्दा पौडेललाई आफ्ना नजिकका मित्र साँच्चिकै आपतमा परेको हुनुपर्छ भन्ने लाग्छ । पैसा पठाउनका लागि तुरुन्त क्युआर कोड उपलब्ध गराउन अनुरोध गर्छन् । उताबाट क्युआर कोड पठाइन्छ जुन आफ्ना मित्रको नामको क्यु आउर नभई अर्कै व्यक्तिको नामको क्युआर हुन्छ । पौडेलले नेटवर्कभन्दा बाहिर भएका कारणले होला अन्य कुनै साथीको क्युआर पठाएको हुनुपर्छ भन्ने ठानी त्यसैमा पैँतिस हजार रुपैयाँ ढिला नगरी पठाइदिन्छन् ।

आफूले पठाएको पैसा प्राप्त भयो वा भएन भनी यकिन गर्न पौडेलले केही समयपछि फोन सम्पर्क गर्छन् । यस पटक फोन उठ्छ र दोहोरो संवाद हुन्छ । उटाबाट आफूले कुनै मेसेज नगरेको, पैसासमेत पठाउन नभनेको, क्युआर पनि नपठाएको, आफ्नो अकाउन्टमा पैसा नआएको तथा उक्त क्युआर कोड आफ्नो पनि नभएको जवाफ आउँछ । जवाफ सुनेर पौडेल आफू ठगिएको ठानी केही बेर झसङ्ग हुन्छन् । त्यसपछि आफू ठगिएको गुनासोसहित साइबर ब्युरो काठमाडौँमा फोनबाटै जानकारी गराउँछन् ।

अन्य व्यक्तिहरुबाट समेत गरी एक लाख बाउन्न हजार बराबरको रकम ह्याकरले ठगी गर्न सफल भएको जानकारी लोकसारथिलाई प्राप्त भएको छ । तिलोत्तमा क्याम्पसका उपप्राचार्य बद्रीनारायण पन्थीको वाट्सएप अकाउन्ट ह्याकरले ह्याक गरी उक्त ठगी कार्य गरेको बुझिएको छ । पन्थीका अनुसार ह्याकरले विभिन्न व्यक्तिहरुका फरक फरक नामका क्युआर कोडहरु प्रयोग गरेर पन्थीका निकटतम सात जना परिचितहरुबाट उक्त रकम असुलेको पाइएको छ ।

आफ्ना अत्यन्त नजिकका शुभचिन्तक वा मित्रहरुलाई आफ्नै नामको वाट्सएप अकाउन्टबाट ह्याकरले त्यसरी ठगेकोमा आफू चिन्तित बनेको पन्थीले बताएका छन् । आफूलाई सहयोग गर्ने उद्देश्यले पठाएको रकम ह्याकरको हातमा परेको खबरपछि ह्याकर विरुद्ध इलाका प्रहरी कार्यालय बुटवलमा जाहेरी दिएका छन् । पौडेललगायत सातै जनाको रकम फिर्ता गराउन पाए आफूलाई सन्तोष मिल्ने पन्थीले बताए ।

ह्याकरले सबिन श्रेष्ठको नाममा रहेको ९७०५५६२४०३ नम्बरबाट खोलिएको इसेवाको क्युआर कोड र खुस्बु लामाको मोबाइल नम्बर ९८२००६७१८० का क्युआरहरु प्रयोग गरेको देखिन्छ । यी दुबै नम्बरमा फोन सम्पर्क गर्दा माफ गर्नुहोला तपाईँले डायल गरेको नम्बर उपलब्ध हुन सकेन भन्ने जवाफ आउँछ ।

पछिल्लो समयमा यस्ता अनलाइन ठगीका घटनाहरु बढ्दै गएका कारणले आमसर्वसाधारण सचेत रहन जरुरी देखिन्छ भने साइबर ब्युरो लगायत राज्यका सबै सुरक्षा संयन्त्र यस्ता गिरोह विरुद्ध कठोर भई गुनासा र उजुरी पर्नसाथ कार्वाहीमा उत्रन आवश्यक छ ।