सम्पादकीय

अछाम सधैँजसो चुनावका बेला सम्झिने, चुनाव सकिएपछि बिर्सिने जिल्ला बनेको छ। सडकको पीडा, रोजगारीको अभाव, स्वास्थ्य सेवाको कमजोर अवस्था—यी सबै समस्या नयाँ होइनन्। नयाँ के हो भने, अब जनता आफैँ थाकिसकेका छन्। यही थकानको बीच राष्ट्रिय स्वतन्त्र पार्टी (रास्वपा) का वरिष्ठ नेता बालेन शाह अछाम पुगेका छन्, र यो आगमन सामान्य चुनावी औपचारिकता मात्र होइन—यो पुरानो राजनीतिमाथिको खुला चुनौती हो।

फागुन २१ मा हुने निर्वाचनलाई लक्षित गर्दै रास्वपाका उम्मेदवार भूपदेव शाहको समर्थनमा मंगलसेन पुगेका बालेन शाहले जनतासँग प्रत्यक्ष संवाद गरे। यो संवाद आफैंमा प्रश्न हो—किन अछाममा यति धेरै नेताहरू चुनावअघि मात्र देखिन्छन् ? किन विकास सधैँ भाषणमै सीमित रहन्छ ?

अछाम–२ मा पटक–पटक जितेका दलहरू आज पनि जनतालाई “हामी फेरि मौका दिनुस्” भन्छन्। तर प्रश्न उठ्छ—दशकौँको मौका दिँदा जनताले के पाए ? न त स्थायी रोजगारी आयो, न त भरपर्दो स्वास्थ्य सेवा। युवाहरू अझै विदेशिन बाध्य छन्, गाउँहरू अझै रित्तिँदै छन्।

यही वास्तविकताले पुरानो राजनीतिको नैतिक आधार नै खोसिसकेको छ। आज जनताको असन्तुष्टि भावनात्मक होइन, तथ्यमा आधारित छ।

रास्वपा कुनै चमत्कार होइन। तर यो बाध्यता हो—पुराना राजनीतिक दलहरुको असफलताबाट जन्मिएको बाध्यता। बालेन शाहजस्ता नेताहरूको उदयले कम्तीमा एउटा कुरा स्पष्ट पारेको छ—जनताले अब “अनुहार मात्र बदलिएको उही राजनीति” स्वीकार गर्न तयार छैनन्।

अछाममा देखिएको युवाको उत्साह संयोग होइन। त्यो विगतप्रतिको आक्रोश र भविष्यप्रतिको आशाको मिश्रण हो।

यो निर्वाचन जीत–हारको साधारण गणित मात्र होइन। यो जनताको फैसला हो—असफलतालाई पुरस्कार दिने कि परिवर्तनलाई जोखिम लिने ? यदि फेरि उही दल, उही शैली, उही बहानाले जिते भने त्यसको जिम्मेवारी जनताले पनि लिनुपर्नेछ। किनकि त्यसपछि गुनासो गर्ने नैतिक अधिकार कमजोर हुन्छ।

अछाम–२ अब प्रयोगशाला बनेको छ। यहाँको मतले सुदूरपश्चिम मात्र होइन, देशभर सन्देश जानेछ—के नेपाली जनता अझै पनि भाषणमै सन्तुष्ट छन्, कि परिणाम खोज्न थालेका छन् ?

बालेन शाहको उपस्थिति एउटा संकेत हो, चेतावनी हो। अब निर्णय जनताकै हातमा छ।
फागुन २१ ले पुरानो राजनीतिलाई फेरि मौका दिने कि अन्तिम चेतावनी दिने—त्यो दिन टुंगो लाग्नेछ।