लोकसारथि संवाददाता, काठमाडौं ।

आगामी फागुन २१ गते हुने प्रतिनिधिसभा निर्वाचनका लागि मधेश प्रदेशका आठ वटै जिल्लामा कुल ४ हजार ४ सय ७१ मतदान केन्द्र निर्धारण गरिएको छ। तीमध्ये १ हजार २ सय ४६ मतदान स्थल अति संवेदनशील सूचिमा राखिएका छन् भने १ सय ६० मतदान केन्द्रलाई मात्र सामान्य श्रेणीमा वर्गीकरण गरिएको छ।

मधेश प्रदेश प्रहरी कार्यालयका प्रवक्ता एसएसपी कमल थापाका अनुसार सुरक्षा चुनौती देखिएका मतदान स्थललाई अति संवेदनशील, केही जोखिम रहेका स्थललाई संवेदनशील र न्यून जोखिम भएका स्थललाई सामान्य सूचीमा राखिएको हो। सबै जिल्लाका मतदान स्थलमा स्थलगत अनुगमन, निरीक्षण तथा सुरक्षा जोखिम मूल्याङ्कनपछि मतदान स्थललाई सामान्य, संवेदनशील र अति संवेदनशील गरी तीन वर्गमा वर्गीकरण गरिएको उनले जानकारी दिए।

प्रदेशका आठ जिल्लामध्ये सप्तरी जिल्लाका मतदान केन्द्रमा सुरक्षा चुनौती सबैभन्दा बढी देखिएको छ। जिल्लामा रहेका २ सय ९६ मतदान स्थलमध्ये २ सय ९ ओटा मतदान स्थल अति संवेदनशील सूचीमा परेका छन्।

यसैगरी, सिराहामा १ सय ५४, धनुषामा १ सय ९४, महोत्तरीमा १ सय ६३, सर्लाहीमा १ सय ५८, रौतहटमा १ सय ५२, बारामा १ सय ४५ मतदान स्थल अति संवेदनशील सूचीमा राखिएका छन्।

मधेश प्रदेशका आठ वटै जिल्लामा कुल ७ सय ६३ मतदान स्थल संवेदनशील सूचीमा रहेका छन्। तीमध्ये सर्लाही जिल्लामा सबैभन्दा बढी १ सय ३१ मतदान स्थल संवेदनशील सूचीमा परेको मधेश प्रदेश प्रहरी कार्यालयले जनाएको छ।

निर्वाचनलाई शान्तिपूर्ण, निष्पक्ष र भयरहित वातावरणमा सम्पन्न गराउन मधेश प्रदेशमा ५० हजारभन्दा बढी संयुक्त सुरक्षा फौज परिचालन गरिने तयारी गरिएको छ।

प्रवक्ता थापाका अनुसार:

४० हजार नेपाल प्रहरी तथा निर्वाचन प्रहरी, १० हजार सशस्त्र प्रहरी बल (एपीएफ) परिचालन गरिनेछ। अतिरिक्त आवश्यकता परेमा नेपाली सेनासमेत परिचालन गरिने तयारी रहेको छ।

सुरक्षा निकायले अति संवेदनशील र संवेदनशील मतदान स्थलमा विशेष सुरक्षा योजना लागू गरिने, गस्ती, निगरानी तथा तत्काल प्रतिक्रिया टोली (क्विक रिस्पोन्स टिम) परिचालन गरिने जनाएको छ।

मधेश प्रदेशमा विगतका निर्वाचन अनुभव, राजनीतिक प्रतिस्पर्धा र स्थानीय संवेदनशीलतालाई ध्यानमा राख्दै यसपटक सुरक्षा व्यवस्थालाई उच्च प्राथमिकतामा राखिएको सुरक्षा निकायको दाबी छ। मतदाताले निर्भीक रूपमा मतदान गर्न पाउने वातावरण सुनिश्चित गर्न सबै सुरक्षा संयन्त्र परिचालन गरिने जनाइएको छ।