मुम्बई, माघ १२ – बलिउड अभिनेता सैफ अली खानमाथि चक्कु आक्रमण गरेको आरोपमा पक्राउ परेका मोहम्मद शरिफुल इस्लाम शहजादको हिरासत अवधि जनवरी २९ सम्म थप गरिएको छ।

समाचार एजेन्सी पीटीआई र एएनआईका अनुसार मुम्बईको एक अदालतले अभियुक्तलाई थप अनुसन्धानका लागि हिरासतमा राख्न अनुमति दिएको हो। मुम्बई प्रहरीले शरिफुल बंगलादेशी नागरिक हुन सक्ने आशंका गरिरहेको छ।

आक्रमणको घटना

सैफ अली खानमाथि यही जनवरी १६ राति मुम्बईको बान्द्रास्थित निवासमै चक्कु आक्रमण भएको थियो। आक्रमणकारीले छ पटक चक्कु प्रहार गर्दा सैफ गम्भीर घाइते भएका थिए। उनलाई पाँच दिनसम्म अस्पतालमा उपचारपछि डिस्चार्ज गरिएको थियो।

परिवारलाई सुरक्षा

घटनापछि मुम्बई प्रहरीले सैफ अली खान र उनको परिवारलाई सुरक्षा प्रदान गरेको छ।

प्रहरीले घटनाको विस्तृत अनुसन्धान गरिरहेको छ भने आक्रमणको कारणबारे अझै खुलासा भएको छैन।