लोकसारथि संवाददाता, काठमाडौं ।

आन्तरिक बजारमा सुनको मूल्यले नयाँ कीर्तिमान कायम गरेको छ। आज सुन प्रतितोला (११.६६ ग्राम) ३ लाख १८ हजार ८ सय रुपैयाँमा कारोबार भइरहेको छ। यस्तै, चाँदीको मूल्य पनि हालसम्मकै उच्च विन्दुमा पुगेको छ । चाँदी आज प्रतितोला ७ हजार ३ सय रुपैयाँमा कारोबार भइरहेको छ।

नेपाल सुनचाँदी व्यवसायी महासङ्घका अनुसार मंगलबार प्रतितोला ३ लाख ९ हजार ३ सय रुपैयाँमा कारोबार भएको सुनको मूल्य एकै दिनमा ९ हजार ५ सय रुपैयाँले बढेको हो। त्यस्तै, मंगलबार प्रतितोला ६ हजार ८ सय ७० रुपैयाँमा कारोबार भएको चाँदीको मूल्य पनि उल्लेख्य रूपमा वृद्धि भएको महासङ्घले जनाएको छ।

अन्तर्राष्ट्रिय सञ्चारमाध्यमका अनुसार विश्व बजारमा हाल सुन प्रतिऔँस ५ हजार २ सय अमेरिकी डलरमा कारोबार भइरहेको छ भने चाँदीको मूल्य प्रतिऔँस १ सय ११ अमेरिकी डलर पुगेको छ।

विश्व बजारमा बहुमूल्य धातुको मूल्य निरन्तर उकालो लागेसँगै त्यसको प्रभाव नेपाली बजारमा पनि प्रत्यक्ष रूपमा देखिएको व्यवसायीहरूको भनाइ छ। (रासस)