लोकसारथि संवाददाता, काठमाडौं ।

सामाजिक सञ्जाल प्रतिबन्धविरुद्ध भड्किएको जेनजी पुस्ताको आन्दोलन मंगलबार पनि जारी रहँदा निवर्तमान गृहमन्त्री रमेश लेखकको घरमा प्रदर्शनकारीले तोडफोड गरेका छन्।

मंगलबार साँझ काठमाडौंको नैकापस्थित लेखकको निवासमा प्रदर्शनकारीहरूले तोडफोड गर्दै आगजनी प्रयाससमेत गरेको घटनास्थलमा रहेका पत्रकार रोशन दानीले जानकारी दिएका छन्। दानीका अनुसार, प्रदर्शनकारीहरू घरमा प्रवेश गरी निरन्तर ढुंगामुढा र तोडफोड गरिरहेका थिए।

याद रहोस्, काठमाडौंको नयाँबानेश्वर र सुनसरीको इटहरीमा सोमबार भएको जेनजी प्रदर्शनमा प्रहरीले बल प्रयोग गर्दा १९ जनाको मृत्यु भएपछि लेखकले नैतिक जिम्मेवारी लिँदै सोमबार नै गृहमन्त्री पदबाट राजीनामा दिएका थिए।