काठमाडौं । नेपालमा सोमबारदेखि सुरु भएको ‘जेन-जी’ आन्दोलन उग्र हिंसात्मक रूप लिन पुगेको छ। राजधानी काठमाडौंसहित विभिन्न स्थानमा भड्किएको आन्दोलनमा आगजनी, तोडफोड र आक्रमणका घटनाले मुलुक तनावग्रस्त बनेको छ। आन्दोलनकारीले ओली नेतृत्वको सरकारले भ्रष्टाचार र सामाजिक सञ्जाल प्रतिबन्धमार्फत जनताको आवाज दबाउने प्रयास गरेको आरोप लगाउँदै आन्दोलन चर्काएका हुन्।

पूर्वप्रधानमन्त्री खनालकी पत्नीलाई जीवितै जलाइयो

आन्दोलनको क्रममा सबैभन्दा दुखद घटना पूर्वप्रधानमन्त्री झलनाथ खनालकी पत्नी राजलक्ष्मी चित्रकारको मृत्यु भएको छ। ललितपुरस्थित डलु आवासमा उग्र भीडले आगजनी गर्दा उनी गम्भीर रूपमा जलेकी थिइन्। कीर्तिपुर बर्न अस्पताल पुर्‍याए पनि चिकित्सकहरूले उनलाई मृत घोषणा गरेका थिए। खनाल २०११ फेब्रुअरीदेखि अगस्टसम्म नेपालका प्रधानमन्त्री भएका थिए।

डीएसपीको पिटाइबाट हत्या

सरकारले स्थिति नियन्त्रणका लागि देख्नेबित्तिकै गोली हान्न आदेश दिएको थियो। उक्त आदेश लागू गर्ने जिम्मेवारी लिएका एक डीएसपीलाई आन्दोलनकारीहरूले नियन्त्रणमा लिएर पिट्दै हत्या गरेको विभिन्न प्रतिवेदनहरूमा उल्लेख छ। यस घटनाले सुरक्षाकर्मीमाझ त्रास थपिएको बताइएको छ।

शीर्ष नेतामाथि आक्रमण

हिंसात्मक प्रदर्शनकै बीच आन्दोलनकारीले पूर्वप्रधानमन्त्री शेरबहादुर देउवालाई पनि कुटपिट गरेका थिए। नेपाली सेनाको हस्तक्षेपपछि मात्र देउवा ज्यान जोगाउन सफल भएका थिए। त्यस्तै, उपप्रधानमन्त्री तथा अर्थमन्त्री विष्णु पौडेलमाथि समेत आक्रमण भएको छ। आन्दोलनकारीहरूले उनलाई सडकमा दौडाउँदै कुटपिट गरेको भिडियो सामाजिक सञ्जालमा फैलिएको छ। पौडेल भागेर ज्यान जोगाउन सफल भए पनि गम्भीर चोट लागेको बताइएको छ।

संसद्, राष्ट्रपति भवनदेखि प्रधानमन्त्री निवाससम्म आक्रमण

उग्र भीडले संसद् भवन, राष्ट्रपति भवन, प्रधानमन्त्री निवासलगायत सरकारी संरचनामा ढुंगामुढा र आगजनी गरेका छन्। कैयौं मन्त्री र नेताका निवाससमेत आक्रमणमा परेका छन्।

अवस्था नियन्त्रणबाहिर

आन्दोलनका क्रममा २० भन्दा बढीको मृत्यु भइसकेको र सयौं घाइते भएको बताइएको छ। प्रहरीले अत्यधिक बल प्रयोग गरेको भन्दै आन्दोलनकारीहरू अझ आक्रोशित बनेका छन्। देशभर कर्फ्यू जारी गरिए पनि स्थिति नियन्त्रणमा आउन सकेको छैन।