लोकसारथि संवाददाता, काठमाडौं ।

जेन–जेड आन्दोलनको क्रममा तिलोत्तमा नगरपालिका–४ मा रहेको निजी घर र ड्राइभरटोलस्थित ‘होटल टुलिप प्रा.लि.’ मा आगजनी तथा तोडफोड भएपछि तिलोत्तमा नगरपालिकाका पूर्वमेयर तथा रुपन्देही–५ का सांसद बासुदेव घिमिरेले सामाजिक सञ्जालमार्फत आफ्नो गहिरो पीडा सार्वजनिक गरेका छन्।

“प्रिय जेनजी बाबुनानीहरू” सम्बोधन गर्दै उनले २०८२ भदौ २५ गते राति भएको घटनाप्रति प्रतिक्रिया जनाउँदै आन्दोलनमा मृत्यु भएका बालबालिकाप्रति श्रद्धाञ्जलि प्रकट गरेका छन्। साथै उनले आफूले निरन्तर भ्रष्टाचार नियन्त्रण, सुशासन, उत्पादन र रोजगारीका पक्षमा आवाज उठाउँदै आएको दाबी गर्दै आन्दोलनमा देखिएको हिंसात्मक स्वरूपप्रति दुःख व्यक्त गरेका छन्।

विदेशमा पसिना बगाएर बनाएको घर जल्यो

घिमिरेले आफूले दक्षिण कोरियामा वैदेशिक रोजगारी गरेर कमाएको पैसाबाट घर निर्माण गरेको उल्लेख गर्दै भनेका छन्, “परिवारसँग बिछोड भएर पसिना बगाएर कमाएको पैसाले बनाएको घर र ऋण बोकेर सुरु गरेको होटल व्यवसाय आज जेनजेको नाममा ध्वस्त पारियो।”

उनले अझै पनि बैंक तथा वित्तीय संस्थाको ऋण तिर्नुपर्ने बाध्यता रहेको उल्लेख गर्दै उत्पादनसँग जोडिएको व्यवसायलाई संविधानले नै दिएको अधिकारअनुसार सुरु गरेको बताए।

आन्दोलनमा घुसपैठ भएको दाबी

घिमिरेले आफ्ना घर र व्यवसायमा तोडफोड गर्ने कार्य शुद्ध जेनजी आन्दोलनकारीले नगरेको दाबी गर्दै भनेका छन्, “म विश्वस्त छु, यो तपाईंहरूको आन्दोलनमा घुसपैठ भएको हो।”

राजनीतिक जीवन र उपलब्धिहरू स्मरण

आफू तिलोत्तमा नगरपालिकाको पहिलो निर्वाचित नगरप्रमुख भएको स्मरण गर्दै उनले नगरलाई राष्ट्रिय तथा अन्तर्राष्ट्रिय स्तरमा चिनाउन योगदान दिएको दाबी गरे।
त्यस्तै २०७९ सालमा रुपन्देही–५ बाट प्रतिनिधिसभा सदस्यमा निर्वाचित भएपछि संसद्मा निरन्तर भ्रष्टाचार नियन्त्रण, सुशासन, युवा–मैत्री नीतिहरूको पक्षमा आवाज उठाएको उनको भनाइ छ।

छानबिन र कारबाहीको माग

“मैले कुनै गलत तरिकाले सम्पत्ति जोडेको भए छानबिन होस्, म सधैं तयार छु,” भन्दै घिमिरेले घर र व्यवसाय जलाउनेहरूलाई कडा कारबाही गर्न आग्रह गरेका छन्।

उनले जेनजीको माग र आफ्ना राजनीतिक मुद्दा समान रहेको उल्लेख गर्दै लोकतन्त्र र गणतन्त्रकै माध्यमबाट राजनीतिक स्थायित्व र सुशासन स्थापित हुने विश्वास व्यक्त गरेका छन्।

निष्कर्ष

फेसबुक पोस्टको अन्त्यमा उनले लेखेका छन्, “लोकतन्त्र/गणतन्त्र दुनियाँकै उत्कृष्ट व्यवस्था हो। यहीँ व्यवस्थाबाट तपाईंहरूले उठाएका मुद्दा स्थापित होऊन् भन्ने शुभकामना व्यक्त गर्दछु।”