लोकसारथि संवाददाता, बुटवल।

काठमाडौँ । जेन्जी मुभमेन्ट नेपालले देशमा स्थायित्व, सुशासन र संरचनात्मक रूपान्तरणका लागि निर्णायक संघर्ष सुरु गर्ने घोषणा गरेको छ। काठमाडौंको कीर्तिपुरमा सम्पन्न आकस्मिक भेलाले विद्रोहका प्रमुख मुद्दाहरू अपहरणमा परेका र युवा पुस्ताको बलिदानलाई राजनीतिक स्वार्थमा रूपान्तरण गरिएको आरोप लगाउँदै आन्दोलनको नयाँ चरण सुरु गर्ने निर्णय गरेको हो।

भेलाले जारी वक्तव्यमा भनिएको छ— “देशमा स्थायित्व र सुशासनका लागि अब निर्णायक संघर्ष अपरिहार्य बनेको छ। विद्रोहका मुद्दाहरू राजनीतिक सौदाबाजीको माध्यम बनेका छन्, जुन हाम्रो बलिदानको अपमान हो।”

भेलाले स्पष्ट रूपमा प्रधानमन्त्री सुशीला कार्की नेतृत्वमाथि तीव्र आलोचना गरेको छ। मुभमेन्टले भनेको छ, “कार्कीहरूले बलिदानको नाममा सत्ता कब्जा गरेका छन्। यो आन्दोलनका सहिदहरूप्रति गरिएको विश्वासघात हो।” सहभागीहरूले कार्की नेतृत्वको सरकार सत्ता ‘कु’को उपज रहेको र त्यसले विद्रोहका उपलब्धिलाई मोलमोलाइ गर्न खोजेको आरोप लगाए।

जेन्जी मुभमेन्टका प्रवक्ता विजय शाहले भने, “यो देशको नयाँ पुस्ताले केवल प्रतीकात्मक परिवर्तन होइन, संरचनात्मक रुपान्तरण खोजेको हो। प्रत्यक्ष निर्वाचित कार्यकारी प्रणाली र सार्वजनिक संस्थाहरूको पुनरसंरचना बिना स्थायित्व र सुशासन सम्भव छैन।”

भेलाले ती दुई प्रमुख मागहरू — प्रत्यक्ष कार्यकारी प्रणाली र संस्थागत पुनरसंरचना — पूर्ण नभएसम्म संघर्ष जारी राख्ने घोषणा गरेको छ। मुभमेन्टले अबको आन्दोलनलाई शान्तिपूर्ण तर निर्णायक बनाउने प्रतिबद्धता पनि जनाएको छ।

भेलाले देशभरका युवाहरू, नागरिक समाज, र सचेत वर्गलाई पुनः एकताबद्ध हुन आह्वान गर्दै भन्यो —
“हाम्रो बलिदान इतिहासको प्रतीक होइन, भविष्यको दिशा हो। यो पुस्ताले सत्य र परिवर्तनका लागि अन्तिमसम्म संघर्ष गर्नेछ।”

कार्यक्रममा जेन्जी आन्दोलनका अगुवा अजय सोडारीले नयाँ पुस्ताले गरेको विद्रोहका मुद्दाहरूलाई संस्थागत गर्न सबै देशभक्त र सचेत युवाहरू एकै मोर्चामा उभिनुपर्नेमा जोड दिए। उनले भने, “यो आन्दोलन केवल असन्तुष्टिको अभिव्यक्ति होइन, राष्ट्रको पुनर्जागरणको आह्वान हो।”

भेलामा आन्दोलनका आगामी चरण, जनसंपर्क विस्तार, र राष्ट्रिय समन्वय समिति गठनबारे पनि विस्तृत छलफल गरिएको बताइएको छ। मुभमेन्टले निकट भविष्यमै देशव्यापी अभियान सुरु गर्ने तयारी गरेको छ।

भेलाले आगामी कार्तिक २३ गते काठमाडौंमा विशाल जेन्जी सभा आयोजना गर्ने निर्णय समेत गरेको छ। उक्त सभाबाट आन्दोलनको नयाँ दिशा र ठोस कार्यक्रम सार्वजनिक गरिने मुभमेन्टले जनाएको छ।

भट्टराईको नेतृत्वमा वैकल्पिक शक्तिहरूबीच भइरहेको छलफल र नयाँ पुस्ताको यो घोषणाले नेपालको राजनीतिक परिदृश्यमा पुनः एकपटक संरचनात्मक रूपान्तरण र वैकल्पिक नेतृत्वको खोजलाई केन्द्रविन्दुमा ल्याएको छ।

अब हेर्न बाँकी छ — जेन्जी मुभमेन्टको यो नयाँ चरणले युवा पुस्ताको बलिदानलाई संस्थागत उपलब्धिमा परिणत गर्न सक्नेछ कि, फेरि पनि पुराना शक्ति र स्वार्थका जालोभित्र हराउनेछ।

देश स्थायित्व र सुशासनको प्रतीक्षा गर्दैछ — र नयाँ पुस्ता पुनः सडकमा आफ्नो उत्तर खोज्दैछ।