७ माघ, बुटवल ।

कक्षा १० को माध्यमिक शिक्षा परीक्षा (एसईई) चैत १९ गतेदेखि २९ गतेसम्म सञ्चालन हुने भएको छ। शैक्षिक क्यालेन्डरअनुसार परीक्षा चैतको पहिलो सातामै सुरु हुनुपर्ने भए पनि राष्ट्रिय निर्वाचनका कारण परीक्षा तालिका परिमार्जन गरिएको हो।

राष्ट्रिय परीक्षा बोर्डका परीक्षा नियन्त्रक टुकराज अधिकारीका अनुसार चैत १९ गतेदेखि परीक्षा सञ्चालन गर्ने निर्णय भइसकेको छ। “निर्वाचनका कारण विद्यालय, शिक्षक तथा सुरक्षासम्बन्धी व्यवस्थापन प्रभावित हुने भएकाले परीक्षा केही दिनपछि सारिएको हो,” उनले बताए।

यसपटकको एसईई परीक्षा देशभर एकैसाथ सञ्चालन हुनेछ। परीक्षा केन्द्र, निरीक्षक, प्रश्नपत्र व्यवस्थापन तथा सुरक्षा प्रबन्धलाई प्रभावकारी बनाउन बोर्डले तयारी तीव्र पारेको जनाएको छ। बोर्डका अनुसार परीक्षा बिहानको सिफ्टमै सञ्चालन गरिनेछ र परीक्षा केन्द्रहरू विद्यालयमै रहनेछन्।

एसईईमा सहभागी हुने विद्यार्थी संख्या करिब पाँच लाखको हाराहारीमा रहने अनुमान गरिएको छ। बोर्डले विद्यार्थी, अभिभावक तथा विद्यालयलाई परीक्षा तयारीमा कुनै अन्योल नराख्न आग्रह गर्दै औपचारिक परीक्षा तालिका छिट्टै सार्वजनिक गरिने जनाएको छ।

शिक्षा मन्त्रालयले पनि एसईईलाई मर्यादित, व्यवस्थित र शान्तिपूर्ण रूपमा सम्पन्न गर्न सबै सरोकारवालालाई सहकार्य गर्न आग्रह गरेको छ। परीक्षा अवधिमा विद्यार्थीको मनोवैज्ञानिक अवस्था, अनुशासन र स्वास्थ्य सुरक्षामा विशेष ध्यान दिन विद्यालयहरूलाई निर्देशन दिइएको छ।

निर्वाचनपछिको अवस्थामा शैक्षिक गतिविधि नियमित रूपमा सञ्चालन गर्न एसईई तालिका यथासक्य नजिकैको मितिमा तोकिएको बोर्डको भनाइ छ।