लोकसारथि संवाददाता, बाँके ।

बाँकेको डडुवा गाउँपालिका–३ बनकट्टीकी एक युवती मामा घर जान भनेर घरबाट निस्केको करिब एक महिनापछि मृत अवस्थामा भेटिएकी छन् । हत्या गरी इनारमा फालिएको अवस्थामा शव फेला परेपछि प्रहरीले अनुसन्धानका क्रममा मृतक युवतीकै प्रेमीलाई पक्राउ गरेको छ ।

घटना माघ १ गते बिहान करिब साढे १० बजे सार्वजनिक भएको हो । बनकट्टी गाउँस्थित राम फेरन कुर्मीको घर पछाडि रहेको वर्षौंदेखि प्रयोगविहीन इनारबाट दुर्गन्ध आउन थालेपछि स्थानीयले प्रहरीलाई खबर गरेका थिए । प्रहरी टोली घटनास्थल पुगेर इनारबाट सडिसकेको शव निकालेको थियो ।

शव अत्यधिक सडिसकेको अवस्थामा रहेकाले प्रारम्भिक रूपमा पहिचान गर्न कठिन भएको प्रहरीले जनाएको छ । तर, मृतकले लगाएका कपडा र गहनाको आधारमा ती युवती सोही ठाउँकी २१ वर्षीया बसन्ती गोडिया भएको पुष्टि भएको थियो । शव पोस्टमार्टमका लागि भेरी अस्पताल, नेपालगञ्ज पठाइएको थियो ।

भेरी अस्पतालको पोस्टमार्टम रिपोर्टमा ‘चोप इन्ज्युरी टू नेक एण्ड हेड’ अर्थात् टाउको र घाँटीको विभिन्न भागमा गहिरो चोट लागेको उल्लेख छ । रिपोर्टका आधारमा प्रहरी घटनालाई हत्या ठहर गर्दै अनुसन्धान अघि बढाएको बाँकेका प्रहरी प्रमुख (एसपी) अंगुर जिसीले जानकारी दिए ।

मृतक बसन्ती गोडिया करिब एक महिनाअघि मामा घर जान भनेर घरबाट निस्किएको परिवारले जनाएको थियो । तर, अनुसन्धानका क्रममा उनी भारतको नानापारास्थित मामा घर नगएको खुलेको एसपी जिसीले बताए ।

प्रहरी अनुसन्धानका क्रममा मृतक युवती करिब एक वर्षदेखि आफ्नै घर छेउका २५ वर्षीय राकेश बर्मासँग प्रेम सम्बन्धमा रहेको खुलेको छ । अनुसन्धान अगाडि बढाउँदै जाँदा बर्माले नै बसन्तीको हत्या गरी शव इनारमा फालेको स्वीकार गरेको प्रहरीले जनाएको छ ।

प्रहरीका अनुसार बर्माले आफू प्रेम सम्बन्धमा रहँदा बसन्तीको अन्य युवकसँग पनि सम्बन्ध रहेको थाहा पाएपछि आवेगमा आएर हत्या गरेको बयान दिएका छन् ।

प्रहरी अनुसन्धान विवरणअनुसार बर्माले माघको सुरुवाततिर राति करिब ११ बजे ‘सल्लाह गर्नुछ’ भन्दै प्रेमिकालाई घरबाट बोलाएका थिए । त्यसपछि नजिकैको लाहारी बारीमा लगेर विवाद भएको र त्यही क्रममा टाउकामा प्रहार गरी हत्या गरेको उनले स्वीकारेका छन् । हत्या पछि शव इनारमा फालिएको प्रहरीले जनाएको छ ।

घटनामा संलग्न अभियुक्तलाई नियन्त्रणमा लिई थप अनुसन्धान भइरहेको र आवश्यक कानुनी प्रक्रिया अघि बढाइएको जिल्ला प्रहरी कार्यालय बाँकेले जनाएको छ ।