बुधबार, २८ जनवरी को दिन कोलम्बियाको एक ट्विन–प्रोपेलर विमान भेनेजुएलाको सीमाना नजिक पहाडी क्षेत्रमा दुर्घटनाग्रस्त भएको छ। उक्त विमानमा सवार सबै १५ जनाको मृत्यु भएको पुष्टि गरिएको छ। मृतकमध्ये कोलम्बियाका एक सांसद पनि रहेका छन्।

दुर्घटनाग्रस्त विमान कोलम्बियाको सरकारी विमान सेवा सैटेना (SATENA) द्वारा सञ्चालन गरिएको थियो। विमानले सीमावर्ती शहर कुकुटाबाट उडान भरेको थियो र यसको गन्तव्य ओकाना रहेको थियो। सम्पूर्ण उडान समय करिब २३ मिनेटको मात्र थियो।

स्थानीय समयअनुसार अपराह्न करिब ५ बजे (१७०० GMT) ओकानामा अवतरण हुन केही समय बाँकी रहँदा विमानको हवाई यातायात नियन्त्रणसँग सम्पर्क टुटेको थियो। त्यसपछि विमान एन्डिज पर्वत श्रृंखलाको पूर्वी सीमामा पर्ने दुर्गम, घना जंगल र उबड–खाबड भूभागमा खसेको हो।

कोलम्बियाली विमानन प्राधिकरणका एक अधिकारीले समाचार एजेन्सी एएफपीसँग भने,
“कोही पनि जीवित छैन।”

दुर्घटनाको कारण तत्काल स्पष्ट हुन सकेको छैन र घटनाबारे छानबिन जारी रहेको बताइएको छ।

सांसदसहित १३ यात्रु र २ चालक दल सदस्यको मृत्यु

विमानमा १३ जना यात्रु र चालक दलका २ सदस्य गरी जम्मा १५ जना सवार थिए।
ट्विन–प्रोपेलर (दुई इन्जिन) विमान भन्नाले दुईवटा प्रोपेलर जडित विमानलाई जनाइन्छ, जुन प्रायः टर्बोप्रोप वा पिस्टन इन्जिनबाट सञ्चालन हुन्छन्। यस्ता विमानहरू सामान्यतया छोटो दूरीका क्षेत्रीय उडानका लागि प्रयोग गरिन्छन्, विशेष गरी ठूला जेट विमान सञ्चालन गर्न कठिन भूभागमा।

दुर्घटनापछि कोलम्बियाली सरकारले खोज तथा उद्धार अभियानका लागि वायुसेना परिचालन गरेको छ। उक्त क्षेत्र मौसमका दृष्टिले अत्यन्तै चुनौतीपूर्ण मानिन्छ, जहाँ अवस्था छिट्टै परिवर्तन हुन सक्छ।

यसका साथै, आसपासका धेरै ग्रामीण क्षेत्रहरू कोलम्बियाको सबैभन्दा ठूलो गुरिल्ला समूह नेशनल लिबरेसन आर्मी (ELN) को प्रभाव क्षेत्रमा पर्ने भएकाले उद्धार कार्य झनै जटिल बनेको बताइएको छ।

हालसम्म ७ शव बरामद

स्थानीय समाचार पत्रिका सेमानासँगको कुराकानीमा कोलम्बियाको नर्थ सान्टेन्डर राज्यका गभर्नर विलियम विलामिजारले हालसम्म ७ वटा शव फेला परिसकेको जानकारी दिएका छन्।

मृतकमध्ये ३६ वर्षीय सांसद डायोजनीज क्विन्टेरो तथा आगामी निर्वाचनका उम्मेदवार कार्लोस साल्सेडो पनि रहेका छन्।

कोलम्बियाका वामपन्थी राष्ट्रपति गुस्तावो पेट्रोले सामाजिक सञ्जाल प्लेटफर्म एक्स (X) मार्फत शोक व्यक्त गर्दै यस दुर्घटनाले आफूलाई गहिरो दुःख दिएको बताएका छन्। साथै उनले मृतकका परिवारप्रति पूर्ण एकजुटता र समवेदना प्रकट गरेका छन्।