लोकसारथि संवाददाता, काठमाडौं ।

राष्ट्रिय स्वतन्त्र पार्टी (रास्वपा) का वरिष्ठ नेता तथा काठमाडौं महानगरपालिकाका मेयर बालेन्द्र शाह (बालेन) बस्दै आएको डेरामा चोरी गर्ने तीन जनालाई प्रहरीले पक्राउ गरेको छ ।

जिल्ला प्रहरी परिसर काठमाडौंको टोलीले चोरीमा संलग्न तीन जनालाई पक्राउ गरी उनीहरूबाट चोरीका सामान समेत बरामद गरेको परिसरका एसपी तथा प्रवक्ता पवनकुमार भट्टराईले जानकारी दिए ।

प्रवक्ता भट्टराईका अनुसार पक्राउ पर्नेहरूमा काठमाडौं–१६ बालाजुका ४२ वर्षीय विष्णुबहादुर राजवाहक, सिन्धुपाल्चोक लिसंखुपाखर गाउँपालिका–६ का ४६ वर्षीय खिमबहादुर खड्का र डोटीको दिपायल सिलगढी नगरपालिका–६ का ४५ वर्षीय सञ्जय श्रेष्ठ रहेका छन् ।

प्रहरीका अनुसार उनीहरूले चप्पल कारखाना क्षेत्रमा सितादेवी गुरुङको घरमा रहेको बालेन शाहको डेरा कोठामा चोरी गरेका थिए ।

मुख्य आरोपी राजवाहक बाँसबारीबाट पक्राउ

चोरीमा मुख्य भूमिका रहेको बताइएका विष्णुबहादुर राजवाहकलाई प्रहरीले २३ माघमा बाँसबारीबाट पक्राउ गरेको हो ।

प्रहरीका अनुसार राजवाहक यसअघि पनि चोरी तथा अन्य साधारण अपराधमा मुद्दा चलेका व्यक्ति हुन् । उनीविरुद्ध २४ जेठ २०७२ मा प्रहरी वृत्त कालिमाटीबाट साधारण अपराधमा र ८ असार २०७२ मा प्रहरी वृत्त महाराजगञ्जबाट चोरीको कसुरमा मुद्दा चलेको भेटिएको छ ।

साधारण लेखपढ गर्न जान्ने तथा पेन्टरको काम गर्दै आएका राजवाहकले बालेनको डेरामा चोरी गरेको स्वीकार गरेको एसपी भट्टराईले बताए ।

प्रहरीका अनुसार उनी चोरीकै कसुरमा ३ वर्ष ६ महिना कैद भुक्तान गरिरहेका बेला २४ भदौमा ‘जेनजी आन्दोलन’को क्रममा नख्खु कारागारबाट फरार भएका थिए ।

कारागारबाट फरार भएपछि उनी पाँच वटा चोरी घटनामा संलग्न रहेको प्रारम्भिक अनुसन्धानबाट खुलेको प्रहरीले जनाएको छ । उनले निर्माणाधीन घरहरूबाट धारा, टुटी तथा अन्य घरबाट चाँदीका गिलास, कचौरा, दियो र प्लेट चोरी गरेको बताइएको छ ।

गेष्ट हाउसको कोठाबाट राउटर र सीसीक्यामेरा बरामद

प्रहरीका अनुसार काठमाडौं महानगरपालिका–२६ स्थित ‘क्लासिक एण्ड लज इन गेष्ट हाउस’को कोठा नम्बर ४०२ मा बस्दै आएका राजवाहकको कोठाबाट ‘वर्ल्ड लिंक’ लेखिएको राउटर र दुई थान सीसीक्यामेरा बरामद गरिएको छ ।

त्यस्तै उनको साथबाट ‘एक्रोन गोल्ड’ लेखिएको निलो बिँड भएको पिलास, सलाई रेन्ची, रेती, स्क्रु तथा कालो रंगको ज्याकेट समेत बरामद गरिएको प्रहरीले जनाएको छ ।

खड्का बैंकिङ कसुरका फरार अभियुक्त

प्रहरीले अर्का आरोपी खिमबहादुर खड्कालाई २४ माघमा जडिबुटीबाट पक्राउ गरेको हो । उनी बैंकिङ कसुर मुद्दामा फरार व्यक्ति रहेको खुलेको प्रहरीले जनाएको छ ।

प्रहरीका अनुसार उनीविरुद्ध ११ मंसिर २०७९ मा प्रहरी वृत्त बौद्धबाट मुद्दा चलेको थियो । कक्षा ८ सम्म अध्ययन गरेका खड्का बालुवा डिपो सञ्चालन गर्दै आएका थिए ।

प्रहरीका अनुसार राजवाहकले चोरी गरेका सामानहरू खड्काले बेच्ने गरेको प्रारम्भिक अनुसन्धानबाट खुलेको छ । उनीहरूबीच घर निर्माणसम्बन्धी काम गर्ने क्रममा करिब ८ वर्षदेखि चिनजान रहेको बताइएको छ ।

खड्काको भक्तपुर ठिमी नगरपालिका–दुवाकोटस्थित घरबाट प्रहरीले चाँदीका थाली, कचौरा, रिङ, नटबोल्ट लगायतका सामग्री बरामद गरेको छ । साथै सुनजस्तो देखिने लक्ष्मीको मूर्ति भएको झुम्का, चन्द्रमा, सिक्री, बालाजस्ता सामग्री पनि फेला परेको प्रहरीले जनाएको छ ।

सञ्जय श्रेष्ठ बालाजुबाट पक्राउ

तेस्रो आरोपी सञ्जय श्रेष्ठलाई प्रहरीले २४ माघमै बालाजुबाट पक्राउ गरेको हो ।

प्रहरीका अनुसार उनीविरुद्ध २९ कात्तिक २०६४ मा प्रहरी वृत्त बौद्धबाट जबरजस्ती करणीको कसुरमा मुद्दा चलेको देखिएको छ । कक्षा १० सम्म अध्ययन गरेका श्रेष्ठ खेतीकिसानी गर्ने व्यक्ति हुन् ।

प्रहरीले रामेछाप कारागारमा रहँदा राजवाहक र श्रेष्ठबीच चिनजान भएको जनाएको छ । अनुसन्धानका क्रममा श्रेष्ठले दुई थान ल्यापटप डिकमा राखी राजवाहकलाई ८ हजार रुपैयाँ दिएको खुलेको छ ।

धादिङ धुनीबेशी नगरपालिका–७ लप्सेस्थित उनको कोठाबाट प्रहरीले झोला, डेलको ल्यापटप, म्याकबुक प्रो, चार्जर तथा डीभीआर बरामद गरेको जनाएको छ ।

अनुसन्धान जारी

प्रहरीले चोरी घटनासम्बन्धी थप अनुसन्धान भइरहेको र बरामद सामग्रीको विस्तृत विवरण संकलन गर्दै कानुनी प्रक्रिया अगाडि बढाइएको जनाएको छ ।