२४ फागुन, बुटवल। सर्लाही निर्वाचन क्षेत्र नम्बर–४ मा भएको प्रतिनिधिसभा सदस्य पदको निर्वाचनमा राष्ट्रिय स्वतन्त्र पार्टी (रास्वपा) का उम्मेदवार अमरेशकुमार सिंह विजयी भएका छन्। केहीबेरअघि सम्पन्न अन्तिम मतगणनाअनुसार सिंहले ३५ हजार ६८८ मत प्राप्त गर्दै स्पष्ट अग्रतासहित विजय हासिल गरेका हुन्।

उनका निकटतम प्रतिद्वन्द्वी नेपाली कांग्रेसका सभापति गगनकुमार थापा ले २२ हजार ८३१ मत प्राप्त गरेका छन्। सिंहले थापामाथि करिब १२ हजार ८५७ मतको फराकिलो अन्तर कायम गर्दै जित सुनिश्चित गरेका हुन्।

यस विजयसँगै अमरेशकुमार सिंहले सर्लाही–४ बाट लगातार तेस्रो पटक जित्दै ह्याट्रिक पूरा गरेका छन्। स्थानीय स्तरमा बलियो जनआधार बनाउँदै आएका सिंहले पुनः एकपटक मतदाताको विश्वास जित्न सफल भएका छन्।

यता, राष्ट्रिय राजनीतिमा प्रभावशाली नेताका रूपमा चिनिएका गगनकुमार थापाका लागि भने यो परिणाम राजनीतिक जीवनको पहिलो चुनावी हार बनेको छ। लामो समयदेखि नेपाली कांग्रेसभित्र सुधारवादी नेताका रूपमा परिचित थापा यसपटक सर्लाही–४ बाट प्रतिस्पर्धामा उत्रिएका थिए। तर मतदाताको निर्णय सिंहको पक्षमा गएपछि थापाले पराजय व्यहोर्नुपरेको हो।

निर्वाचन परिणाम सार्वजनिक भएसँगै सर्लाही–४ मा सिंह समर्थकहरूले उत्सव मनाउन थालेका छन्। रास्वपाका कार्यकर्ता तथा समर्थकहरूले यो जितलाई जनताले नयाँ राजनीतिक शक्तिप्रति देखाएको भरोसा र परिवर्तनको संकेतका रूपमा व्याख्या गरेका छन्।

यस निर्वाचन परिणामले सर्लाही–४ को स्थानीय राजनीतिक समीकरणमा मात्र होइन, राष्ट्रिय राजनीतिक वृत्तमा पनि नयाँ बहस र चर्चा सुरु हुने संकेत देखिएको छ।