लोकसारथि संवाददाता, काठमाडौं ।

सत्तारुढ राष्ट्रिय स्वतन्त्र पार्टी (रास्वपा) का सभापति रवि लामिछानेले भारतसँगको सम्बन्ध सुधार र लामो समयदेखि जारी संसद् अवरोध अन्त्य गर्ने पहल थालेका छन्।

प्रधानमन्त्री बालेन्द्र शाहले जेठ ३१ गते प्रतिनिधिसभामा नेपाल–भारत सीमा विवादमा बेलायतले पनि चासो दिनुपर्ने अभिव्यक्ति दिएपछि भारतले असन्तुष्टि जनाएको थियो। त्यसलगत्तै भारतीय जनता पार्टी (भाजपा) को निमन्त्रणामा लामिछाने जेठ १८ देखि २२ गतेसम्म नयाँदिल्ली भ्रमणमा गएर भारतीय प्रधानमन्त्री नरेन्द्र मोदीसहित उच्च राजनीतिक नेतृत्वसँग भेटवार्ता गरेका थिए।

भ्रमणपछि नेपाल फर्किएका लामिछानेले प्रधानमन्त्री शाहसँग छलफल गरी संसद्को गतिरोध अन्त्य गर्न पहल थालेका हुन्। सोही क्रममा सोमबार उनले सर्वदलीय बैठक बोलाएका थिए, जहाँ राजनीतिक दलहरूबीच संवाद पुनः सुरु भएको छ।

रास्वपाका सहमहामन्त्री विपिन आचार्यका अनुसार संसद्को अवरोध अन्त्य गरी राष्ट्रिय मुद्दामा सहमति खोज्ने उद्देश्यले बैठक आयोजना गरिएको हो। बैठकमा भारत भ्रमणबारे जानकारी गराउनुका साथै संसद् सञ्चालनका उपायबारे छलफल भएको थियो।

नेकपा नेता वर्षमान पुनले लामिछानेको पहल सकारात्मक भएको बताउँदै लामो समयपछि दलहरूबीच संवाद सुरु भएको प्रतिक्रिया दिए। यस्तै, राजनीतिक विश्लेषक कृष्ण पोखरेलले भारतसँगको सम्बन्ध सुधार र आन्तरिक राजनीतिक संवादलाई अघि बढाउने लामिछानेको प्रयास प्रशंसनीय रहेको बताए।

बैठकमा प्रधानमन्त्री शाहको विवादास्पद अभिव्यक्तिलाई संसद्को अभिलेखबाट हटाउने विषयमा पनि छलफल भएको बताइएको छ। साथै, संसद् सञ्चालनका लागि विभिन्न विकल्पमाथि सकारात्मक ढंगले विचारविमर्श गरिएको सहभागीहरूले जनाएका छन्।

विश्लेषकहरूका अनुसार प्रधानमन्त्री शाह शासन सञ्चालनमा केन्द्रित रहँदा सभापति लामिछानेले अन्तरदलीय संवाद र राजनीतिक समन्वयको भूमिका निर्वाह गर्नु नेपाली राजनीतिमा नयाँ अभ्यासका रूपमा देखिएको छ।