लोकसारथि संवाददाता, काठमाडौं ।
प्रत्येक वर्ष वैशाख शुक्ल पूर्णिमाका दिन मनाइने किराँत राई समुदायको महान पर्व उभौली यस वर्ष पनि सोमबार देशभर धुमधामका साथ मनाइएको छ। किराँत समुदायले खेतीको सिजन सुरु हुनु अघि प्रकृतिपूजाका रूपमा मनाउने यस पर्वमा विशेष रूपमा भूमेस्थानमा पूजा आराधना गर्ने परम्परा रहिआएको छ।

गाउँगाउँमा रहेका भूमेस्थानहरूमा समुदायका सदस्यहरू भेला भई पृथ्वी, वनस्पति, पानी, चराचुरुङ्गी, जनावर र वातावरणलाई धन्यवाद दिँदै राम्रो बाली र खेतीको सफलताको कामना गर्ने गर्छन्। किराँत विश्वास अनुसार वैशाख शुक्ल पूर्णिमादेखि जङ्गली जनावर र चराचुरुङ्गीहरू पनि उँभो लाग्न थाल्ने भएकाले यस दिनलाई उभौली भनिएको हो।

पर्वको अवसरमा किराँत समुदायका विभिन्न सम्प्रदायबीच परम्परागत साकेला नाच नाचिने गर्छ। यस वर्ष पनि ललितपुरको हात्तीवनस्थित साकेलास्थान मा विशेष पूजा कार्यक्रम गरी साकेला नाच प्रदर्शन गरिएको थियो।

किरात माङहिम व्यवस्थापन समितिका कोषाध्यक्ष मोहन सुनुवारका अनुसार, “मङसिर शुक्ल पूर्णिमादेखि बाली भित्र्याएर बेँसी झरेका मानिस वैशाख शुक्ल पूर्णिमाबाट फेरि उँभो लाग्ने परम्परा अनुसार उभौली पर्व मनाइन्छ।” किराँत राई समुदायले उँधौली पर्व मार्गशीर्ष शुक्ल पूर्णिमाका दिन मनाउँछन्, जसमा जाडो छल्न बेँसी झर्ने प्रथा रहेको छ।

उभौली पर्वले किराँत समुदायको प्रकृतिप्रेम, कृषिसंस्कृति र सामूहिक पहिचानलाई उजागर गर्नुका साथै पर्यावरणप्रति सम्मान प्रकट गर्ने संस्कारलाई समेटेको छ। पर्यावरण संरक्षण र जैविक विविधताको सन्देश बोकेको यो पर्व आज पनि आफ्नो मौलिक स्वरूपमा जीवित छ।