लोकसारथि संवाददाता, काठमाडौं ।

अमेरिका यस समय भीषण हिउँ आँधी र ज्यानलेवा चिसोको चपेटामा परेको छ। नेशनल वेदर सर्भिस (NWS) का अनुसार यो पछिल्ला धेरै वर्षयताकै सबैभन्दा लामो र कठोर जाडो मौसम हुन सक्ने अनुमान गरिएको छ। फेब्रुअरीको सुरुवातसम्म पनि मौसममा सुधार आउने सम्भावना न्यून देखिएको छ।

यस प्राकृतिक विपत्तिका कारण हालसम्म ८० जनाभन्दा बढीको मृत्यु पुष्टि भइसकेको छ। दक्षिण क्यारोलिना विश्वविद्यालयका विज्ञहरूका अनुसार धेरै मानिसले हिउँ आँधीबाट उत्पन्न जोखिमलाई हल्का रूपमा लिने गरेका कारण ज्यान जाने अवस्था सिर्जना भएको हो।

मृत्युका चकित पार्ने कारणहरू

प्राप्त विवरणअनुसार मृत्यु केवल अत्यधिक चिसोका कारण मात्र भएको होइन। कतिपय मानिस घरभित्रै अत्यधिक चिसोको चपेटामा परेका छन् भने केही बर्फ हटाउने क्रममा अत्यधिक शारीरिक दबाबका कारण हृदयाघातबाट मृत्यु भएको जनाइएको छ।

एक दुःखद घटनामा टेक्सास राज्यमा तीन साना दाजुभाइ जमेको पोखरीको बरफ फुटेर पानीमा खस्दा ज्यान गुमाएका छन्।

यसैगरी, विद्युत् आपूर्ति अवरुद्ध भएपछि हिटर वा जेनेरेटरको गलत प्रयोगका कारण कार्बन मोनोअक्साइड विषाक्तता का घटना तीव्र रूपमा बढेका छन्। केवल न्याशभिल सहरमै यस कारण ४० भन्दा बढी बालबालिकाको उपचार गरिएको छ।

सुरक्षाका लागि के गर्ने ?

फेडरल इमरजेन्सी म्यानेजमेन्ट एजेन्सी (FEMA) ले नागरिकहरूलाई आपतकालीन सामग्री किट तयार राख्न आग्रह गरेको छ। उक्त किटमा:

• पिउने पानी

• नपकाई खाने खाना

• टर्च

• ब्याट्री चल्ने रेडियो

• प्राथमिक उपचार सामग्री

• पर्याप्त न्यानो कपडा (कम्बल, टोपी, पञ्जा आदि)
  राख्न सुझाव दिइएको छ।

विद्युत् अवरुद्ध हुँदा हीटिङ उपकरण र चिकित्सकीय साधनहरू बन्द हुन सक्ने भएकाले मोबाइलका लागि पोर्टेबल चार्जर र बिरामीका लागि मेडिकल ब्याकअप योजना पहिल्यै तयार राख्न FEMA ले अनुरोध गरेको छ।

विद्युत् गएपछि अपनाउनुपर्ने सावधानी

घरको बिजुली गएमा न्यानोपन जोगाउन परिवारका सबै सदस्य एकै कोठामा बस्नुपर्ने र झ्यालढोका कम्बलले छोप्नुपर्ने सुझाव दिइएको छ। घरभित्र कहिल्यै पनि क्याम्प स्टोभ वा जेनेरेटर प्रयोग नगर्न FEMA ले चेतावनी दिएको छ, किनकि यसबाट विषालु ग्यास निस्कने जोखिम हुन्छ।

बाहिर निस्कँदा उच्च सतर्कता आवश्यक

बर्फ जमेको सडक वा बाटोमा हिँड्दा चिप्लिने र गम्भीर चोट लाग्ने सम्भावना हुने भएकाले अत्यन्त सावधानी अपनाउन आग्रह गरिएको छ। बर्फ हटाउँदा शरीरमा अत्यधिक दबाब नदिन र विशेषगरी मुटु रोगीहरूले बढी सतर्कता अपनाउन चिकित्सकहरूले सुझाएका छन्। छाती दुख्ने वा सास फेर्न गाह्रो भए तुरुन्त काम रोक्नुपर्ने बताइएको छ।

सूचना र सामाजिक सहयोग महत्त्वपूर्ण

तूफानका बेला इन्टरनेट र मोबाइल सेवा अवरुद्ध हुन सक्ने भएकाले ब्याट्री चल्ने रेडियो सबैभन्दा भरपर्दो सूचना स्रोत बन्ने FEMA ले जनाएको छ। साथै छिमेकीहरू, विशेषगरी वृद्धवृद्धाको अवस्था बुझिरहनु संकटको समयमा ज्यान बचाउने महत्वपूर्ण माध्यम बन्न सक्ने विज्ञहरूको भनाइ छ।

विशेषज्ञहरूका अनुसार पूर्वतयारी र धैर्य नै यस्ता प्राकृतिक विपत्तिको असर कम गर्ने सबैभन्दा प्रभावकारी उपाय हो।