लोकसारथि संवाददाता, काठमाडौं ।

रूसको बश्कोर्तोस्तान गणराज्यमा रहेको एक स्टेट मेडिकल युनिभर्सिटीको होस्टलमा ७ फेब्रुअरीमा भएको चक्कु आक्रमणमा चार भारतीय विद्यार्थी र दुई प्रहरीसहित कम्तीमा ६ जना घाइते भएका छन् । घटनाले अन्तर्राष्ट्रिय सञ्चारमाध्यममा व्यापक चर्चा पाएको छ ।

मिडिया रिपोर्टका अनुसार १५ वर्षीय एक किशोरले ऊफा स्टेट मेडिकल युनिभर्सिटीको होस्टलभित्र विदेशी विद्यार्थीहरूलाई लक्षित गर्दै चक्कु प्रहार गरेको थियो । प्रत्यक्षदर्शीका अनुसार आक्रमणपछि होस्टल परिसरमा रगत फैलिएको र विद्यार्थीहरूबीच अफरातफरी मच्चिएको थियो ।

रगतले ‘स्वास्तिक’ चिन्ह बनाएको आरोप

रूसी सञ्चारमाध्यमहरूका अनुसार होस्टलको भित्तामा पीडितको रगत प्रयोग गरी नाजी ‘स्वास्तिक’ चिन्ह बनाइएको भेटिएको छ । यसले आक्रमणको पछाडि अतिवादी तथा घृणात्मक विचारधारा जोडिएको आशंका थप बलियो बनाएको छ ।

प्रतिबन्धित नियो-नाजी समूहसँग सम्बन्ध?

रिपोर्टअनुसार आक्रमणकारी किशोर ‘नेशनल सोशलिज्म / ह्वाइट पावर (NS/WP) क्रू’ नामक प्रतिबन्धित नियो-नाजी संगठनसँग सम्बन्धित रहेको बताइएको छ । उक्त समूहलाई ‘स्पैरो क्रू’ पनि भनिन्छ । रूसको सर्वोच्च अदालतले सन् २०२१ मै यस समूहलाई आतङ्कवादी संगठन घोषणा गरी प्रतिबन्ध लगाएको थियो ।

आक्रमणका क्रममा आक्रमणकारीले राष्ट्रवादी तथा यहूदी विरोधी नारा लगाएको समेत बताइएको छ ।

पक्राउका क्रममा प्रहरी पनि घाइते

रूसको गृह मन्त्रालयकी प्रवक्ता मेजर जनरल इरिना वोल्कका अनुसार आरोपीलाई पक्राउ गर्न जाँदा उसले प्रतिरोध गरेपछि दुई प्रहरी घाइते भएका थिए । पक्राउ प्रक्रियामा आक्रमणकारी आफैं पनि घाइते भएको र हाल स्थानीय अस्पतालमा उपचाररत रहेको जनाइएको छ ।

एक घाइतेको अवस्था गम्भीर

रूसको स्वास्थ्य मन्त्रालयलाई उद्धृत गर्दै सञ्चारमाध्यमहरूले जनाएअनुसार घाइतेमध्ये एक जनाको अवस्था गम्भीर छ भने अन्य तीन जना विद्यार्थीको अवस्था स्थिर रहेको बताइएको छ ।

घटना ऊफा शहरमा भएको हो, जुन राजधानी मस्कोबाट करिब १,२०० किलोमिटर टाढा रहेको छ । स्थानीय प्रशासनले घटनाबारे उच्चस्तरीय अनुसन्धान सुरु गरेको जनाएको छ ।

किन भारतीय विद्यार्थी नै निशानामा?

घटनामा घाइतेमध्ये चार जना भारतीय विद्यार्थी हुनु र होस्टल विदेशी विद्यार्थी बसोबास गर्ने स्थान भएकाले आक्रमण विदेशी विद्यार्थीविरुद्ध लक्षित थियो कि? भन्ने प्रश्न उठेको छ । यद्यपि रूसी अधिकारीहरूले आक्रमणको वास्तविक उद्देश्यबारे औपचारिक पुष्टि भने गरेका छैनन् ।

प्रहरीले नियो-नाजी गतिविधि र घृणात्मक अपराधसँग जोडेर अनुसन्धान अघि बढाएको बताइएको छ ।