काठमाण्डू, लोकसारथि

स्वास्थ्य तथा जनसंख्या मन्त्रालयले देशभरिका १२ वटा संघीय अस्पतालमा विभिन्न स्वास्थ्य सेवाहरू थप तथा विस्तार गरेको छ। मन्त्रालयका प्रवक्ता डा. प्रकाश बुढाथोकीका अनुसार नयाँ सेवा प्रारम्भसँगै उपचार पहुँच र गुणस्तरमा सुधार हुने अपेक्षा गरिएको छ।

विविध सेवा थप

मन्त्रालयका अनुसार, ट्रमा सेन्टरले अबदेखि सीटी स्क्यान र एक्सरे सेवामा डिजिटल रिपोर्टिङ प्रणाली लागू गरेको छ। यस्तै, पाटन स्वास्थ्य विज्ञान प्रतिष्ठानले न्युरोलोजी सेवामा इलेक्ट्रोमायोग्राफी (EMG) तथा स्नायु सञ्चालन परीक्षण (NCV) सुरु गरेको छ।

कान्ति बाल अस्पतालले बालबालिकाका लागि हेमोडायलासिस सेवा सुरु गरेको छ, जसबाट दीर्घकालीन मिर्गौला समस्या भएका बालबालिकाहरूलाई विशेष राहत मिल्नेछ।

प्रसूति र स्त्रीरोगमा नवीन पहल

परोपकार प्रसूति तथा स्त्रीरोग अस्पतालले कुपण्डोल शाखामा सिमुलेसन प्रयोगशाला स्थापना तथा बर्न युनिट विस्तार गरेको छ। यसले आपतकालीन स्त्रीरोग सेवामा गुणात्मक सुधार ल्याउने विश्वास गरिएको छ।

क्यान्सर, श्वासप्रश्वास र अन्य सेवा विस्तार

भक्तपुर क्यान्सर अस्पतालले मुटुको इको परीक्षण तथा पीईटी स्क्यान (PET) सेवा सुरु गरेको छ भने दुलेगौंडास्थित जीपी कोइराला राष्ट्रिय श्वासप्रश्वास उपचार केन्द्रले पनि हेमोडायलासिस सेवा प्रारम्भ गरेको छ।

कोसी अस्पतालले निःसन्तान उपचार सेवा (IVF) सुरु गरेको छ, जुन प्रजनन समस्याबाट ग्रसित दम्पतीका लागि ठूलो राहत हुने अपेक्षा गरिएको छ।

प्रविधिमा सुधार

डडेलधुरा अस्पतालले एकीकृत ल्याब नमूना संकलन सेवा सुरु गरेको छ, जसले बिरामीका लागि सहजता र प्रभावकारिता बढाउनेछ। नारायणी अस्पताल, वीरगञ्जले एनआइसीयूमा विद्युतीय चिकित्सा प्रतिवेदन प्रणाली लागू गरेको छ।

भेरी अस्पतालले आईसीयू र बर्न शैया विस्तार गरेको छ भने वीर अस्पतालले काठमाडौँ महानगरपालिकासँगको सहकार्यमा पाठेघरको मुखको क्यान्सर परीक्षण सेवा निःशुल्क रूपमा सुरु गरेको छ।

आगामी योजना र बाँकी रहेका अस्पताल

बीपी कोइराला स्वास्थ्य विज्ञान प्रतिष्ठानले निकट भविष्यमा एमसीएच भवन, नयाँ ल्याब मेसिन तथा क्यान ल्याब स्थापना गर्ने तयारी गरेको छ। यता भरतपुर अस्पतालले भने हालसम्म कुनै सेवा थप नगरेको मन्त्रालयले स्पष्ट पारेको छ।

 

स्वास्थ्य सेवा विस्तारसँगै मन्त्रालयले देशभर स्वास्थ्य पूर्वाधार र प्रविधिमा सुधार ल्याउने योजना अगाडि बढाइरहेको जनाएको छ। सेवा विस्तारको यो लहरले सर्वसाधारणलाई गुणस्तरीय र पहुँचयोग्य उपचारमा पहुँच पुर्‍याउने विश्वास लिइएको छ।