– लोकसारथि संवाददाता, काठमाडौं ।
उदयपुरको कटारी नगर अस्पताल फेरि एकपटक उत्कृष्ट बन्न सफल भएको छ। नेपाल सरकारको न्यूनतम सेवा मापदण्ड अन्तर्गत गरिएको मुल्याङ्कनमा देशभरिका ३३ नगर अस्पतालमध्ये कटारी अस्पताल ८८ स्कोर सहित पहिलो स्थानमा परेको हो।
प्रदेश स्वास्थ्य निर्देशनालय धनकुटाबाट गरिएको अनुगमन तथा लेखाजोखा कार्यक्रममा यो उपलब्धि हासिल भएको हो। अनुगमन टोलीले संघीय सरकार र प्रदेश सरकारको संयुक्त मापदण्डका आधारमा मुल्याङ्कन गर्दा अस्पतालले १०० मध्ये ८८ अंक प्राप्त गरेको एमएसएस अफिसर पशुपति खनालले जानकारी दिए।
यसअघि पनि कटारी अस्पतालले ८३ अंकसहित पहिलो स्थान पाएको थियो। अहिलेको ८८ अंकले अस्पताललाई ‘हरियो जोन’ मा राखिएको छ। मूल्याङ्कन नगर अस्पतालहरूले प्रदान गर्ने न्यूनतम सेवाको गुणस्तर, सेवा पहुँच, सरसफाइ, औषधि व्यवस्था, जनशक्ति लगायतका विभिन्न सूचकहरूका आधारमा गरिएको हो।
अस्पतालको सेवामा निरन्तर सुधार
गत दुई दिनसम्म चलेको अनुगमन कार्यक्रममा पहिलो दिन अस्पताल निरीक्षण तथा सेवा अवलोकन गरिएको थियो भने दोस्रो दिन समीक्षा तथा छलफल गरिएको थियो। अनुगमन टोलीमा धनकुटा स्वास्थ्य निर्देशनालयका डा. प्रशान्त शाह, जिल्ला अस्पताल उदयपुरका गाइनोलोजिस्ट डा. मुकेश झा, र एमएसएस अफिसर पशुपति खनाल सहभागी थिए।
खानालले अस्पतालले अझ सुधार गर्नु पर्ने पक्षहरू रहेको भन्दै आगामी दिनमा थप जिम्मेवारीपूर्वक सेवा दिनुपर्ने सुझाव दिएका छन्।
अस्पताल प्रमुखको प्रतिक्रिया
कटारी अस्पतालका मेडिकल सुपरीटेन्डेन्ट डा. गौरव साहले अस्पतालले भोगिरहेका समस्या, सुधारका प्रयास र भावी योजना प्रस्तुत गर्दै हालसम्मको सेवामा सुधार ल्याउन अस्पताल परिवारको योगदान रहेको बताए।
नगरप्रमुखको प्रशंसा
कार्यक्रमका प्रमुख अतिथि कटारी नगरपालिकाका नगरप्रमुख राजेशचन्द्र श्रेष्ठले यो उपलब्धिमा अस्पतालका कार्यालय सहयोगीदेखि लिएर सम्पूर्ण स्वास्थ्यकर्मी र व्यवस्थापन समितिको मेहनत रहेको भन्दै सबैलाई धन्यवाद ज्ञापन गरे। यद्यपि अस्पताल अब प्रदेश सरकार अन्तर्गत पर्ने भए पनि नगरपालिकाको दायित्व यथावत रहने उनले स्पष्ट पारे।
उपप्रमुखको भनाइ
विशिष्ठ अतिथि उपप्रमुख गीता खड्काले सेवाग्राहीले सहज र सन्तोषजनक सेवा पाउन सकून् भन्ने उद्देश्यले अझ जिम्मेवार ढंगले काम गर्न सुझाव दिइन्।
आगामी योजनाः प्रादेशिक अस्पतालमा रूपान्तरण
अस्पतालले अबदेखि प्रादेशिक अस्पतालको रूपमा सेवा विस्तार गर्दै लैजाने योजना रहेको बताइएको छ। नयाँ आर्थिक वर्षदेखि पूर्णरूपमा प्रादेशिक अस्पतालको रूपमा मूल्याङ्कन हुने डा. गौरव साहले जानकारी दिए।
कटारी अस्पतालले पछिल्लो केही वर्षयता गुणस्तरीय सेवा प्रवाह गर्दै आइरहेको छ। स्वास्थ्यको आधारभूत सेवा सुधारका सूचकहरूमा उत्कृष्ट प्रदर्शन गर्नु अस्पतालको प्रतिबद्धता र समर्पणको प्रमाण हो।
थप स्वास्थ्यसम्बन्धी खबरका लागि लोकसारथि अनलाइनमा जोडिनुहोस्।
-
१.
-
२.
-
३.
-
४.
-
५.
-
६.
-
७.
-
८.
-
९.
-
१०.