काठमाडौं – जेनजी आन्दोलनका कारण भौतिक रूपमा ध्वस्त बनेको स्वास्थ्य तथा जनसंख्या मन्त्रालयले शून्य अवस्थाबाट फेरि सेवा सुरु गर्ने तयारी गरेको छ। मन्त्रालयले अहिले **नेपाल स्वास्थ्य अनुसन्धान परिषद (एनएचआरसी)**को नयाँ भवनबाट सेवा संचालन गर्न लागेको हो।

अहिलेसम्म औपचारिक हस्तान्तरण नभए पनि तत्कालै काम सुरु गर्न मन्त्रालयले आवश्यक तयारी अगाडि बढाएको छ। मन्त्रालयका सचिवद्वय डा. विकास देवकोटा र डिल्लीराम शर्माका अनुसार, हाल प्राथमिकता कार्यालय व्यवस्थापनमा दिइएको छ।
“पहिला त कार्यालयकै व्यवस्थापन गर्नुपर्ने छ, त्यसपछि कर्मचारीहरूको मनोबल उच्च बनाएर अघि बढ्छौं,” सचिवद्वयले बताए।

जेनजी आन्दोलनपछि नवनियुक्त प्रधानमन्त्री सुशीला कार्कीले पदभार सम्हालेसँगै स्वास्थ्य मन्त्री पनि चाँडै नियुक्त हुने अनुमान गरिएको छ। यसै तयारीका क्रममा मन्त्रालयले एनएचआरसीको नयाँ भवनमा मन्त्रीको कार्यकक्ष सजाउने काम सुरु गरेको छ।

मन्त्रालयले मन्त्रीको कार्यकक्ष तयार पारिसकेपछि क्रमशः अन्य कोठा र विभागीय कार्यकक्षहरूको व्यवस्थापन गर्दै नियमित सेवा सुचारु गर्ने योजना बनाएको छ।