माले : भारत र माल्दिभ्सबीच जारी तनावका बीच राष्ट्रपति मोहम्मद मुइज्जुमाथि गम्भीर आरोप लगाइएको छ । माल्दिभ्सका राष्ट्रपति मोहम्मद मुइज्जुले एयरलिफ्टका लागि भारतले उपलब्ध गराएको डोर्नियर विमान प्रयोग गर्न अस्वीकार गरेपछि शनिबार माल्दिभ्समा एक १४ वर्षीय बालकको मृत्यु भएको माल्दिभ्सको मिडियाले जनाएको छ ।

नाबालिगलाई ब्रेन ट्युमर थियो र अचानक मस्तिष्कघात भयो, जसका कारण उनको अवस्था नाजुक बन्यो । बालकको अवस्था बिग्रँदै गएपछि परिवारले उनलाई गाफ अलिफ भिलिङ्गिलीस्थित उनको घरबाट राजधानी मालेसम्म लैजान एयर एम्बुलेन्सको अनुरोध गरेका थिए। माल्दिभ्सका सञ्चारमाध्यमका अनुसार अधिकारीहरूले तत्काल मेडिकल निकासीको व्यवस्था गर्न आवेदन दिएका थिए।

माल्दिभ्स मिडियाले बालकका बुबालाई उद्धृत गर्दै भनेका छन्, ‘हामीले स्ट्रोकपछि तुरुन्तै उनलाई माले लैजान आइल्याण्ड एभिएसनलाई फोन गर्‍यौं तर उनीहरूले हाम्रो फोनलाई जवाफ दिएनन्। उनले बिहीबार बिहान ८ः३० बजे फोन उठाए । त्यस्ता केसहरूको समाधान भनेको एयर एम्बुलेन्स हो।’

बालकलाई आपतकालीन निकासी अनुरोधको १६ घण्टापछि मालेमा ल्याइएको थियो। यसैबीच आकस्मिक निकासीको अनुरोध प्राप्त गरेको आशान्धा कम्पनी लिमिटेडले अनुरोध गरेलगत्तै निकासी प्रक्रिया सुरु गरेको विज्ञप्तिमा भनिएको छ, तर दुर्भाग्यवश उडानमा प्राविधिक समस्याका कारण अन्तिम समयमा डाइभर्सन हुन सकेन ।

माल्दिभ्सका मन्त्रीहरूले प्रधानमन्त्री नरेन्द्र मोदीप्रति गरेको अपमानजनक टिप्पणीपछि भर्खरै भारत र द्वीपसमूह राष्ट्रबीचको कूटनीतिक सम्बन्ध बिग्रिएको बेला यो घटनाक्रम आएको हो। बालकको मृत्युमा टिप्पणी गर्दै माल्दिभ्सका सांसद मिकेल नसीमले भने, ‘भारतप्रति राष्ट्रपतिको शत्रुतालाई सन्तुष्ट पार्न जनताले आफ्नो ज्यान दिएर मूल्य चुकाउनु हुँदैन।’