लोकसारथि संवाददाता, काठमाडौं ।
जेनजेड आन्दोलनपछिको परिस्थितिबारे मूल्यांकन र आगामी रणनीति बनाउन नेपाली कांग्रेसले असोज २६ गते केन्द्रीय कार्यसमिति बैठक बोलाएको छ। असोज ३ गते बसेको कार्यसम्पादन समिति बैठकमा मागअनुसार सभापति शेरबहादुर देउवाले बैठक आह्वान गरेका हुन्।

आन्दोलनका क्रममा भदौ २४ गते आफ्नै बूढानीलकण्ठस्थित निवासमै आन्दोलनकारीको हातबाट आक्रमणमा परेका देउवा हाल पनि सैनिक अस्पतालमा उपचाररत छन्। अस्पतालमै रहेका देउवाले उपसभापति पूर्णबहादुर खड्कासँगको छलफलपछि बैठक बोलाउन निर्देशन दिएका थिए।

देउवाले आफू नेतृत्वको कार्यसमितिको कार्यकाल आगामी मंसिरमा सकिने भएकाले नियमित महाधिवेशन गर्नुपर्ने चाहना व्यक्त गरेको उनका निकटस्थ नेताहरूले बताएका छन्। कांग्रेसभित्रको इतर समूहका नेता डा. शेखर कोइरालाले पनि नेतृत्व परिवर्तन नियमित महाधिवेशनमार्फत हुनुपर्ने धारणा राखेका छन्। तर, महामन्त्रीद्वय गगन थापा र विश्वप्रकाश शर्माले भने विशेष महाधिवेशनको पक्षमा हस्ताक्षर संकलन सुरु गरेका थिए।

नेतृत्व परिवर्तनबारे विभिन्न धारणा

कांग्रेस विधानअनुसार अबको महाधिवेशनबाट देउवा सभापति बन्न पाउँदैनन्। यसकारण देउवालाई ‘सम्मानजनक बहिर्गमन’ को बाटो खोजिनुपर्नेमा धेरै नेताहरूको जोड छ।

• संस्थापन पक्ष: देउवासहितका नेताहरू नियमित महाधिवेशनमार्फत नेतृत्व परिवर्तन गर्नुपर्ने बताउँदै आएका छन्। प्रचार विभाग प्रमुख मीन विश्वकर्माले ‘विशेष महाधिवेशन असान्दर्भिक’ भएको बताए।

• इतर समूह: उपसभापति पूर्णबहादुर खड्का र पूर्वउपसभापति विमलेन्द्र निधि लगायतले विधानअनुसार खड्कालाई कार्यवाहकको जिम्मेवारी दिएर पार्टीलाई आगामी निर्वाचनतर्फ उन्मुख गराउनुपर्ने धारणा राखेका छन्।

• महामन्त्री पक्ष: गगन थापा र विश्वप्रकाश शर्मासम्बद्ध युवाहरूले विशेष महाधिवेशन हुनुपर्ने बताइरहेका छन्। गुरुराज घिमिरेको नेतृत्वमा हस्ताक्षर संकलन समेत भइरहेको छ।

• युवा नेताहरू (डा. कोइराला निकट): रञ्जित कर्ण, भूपेन्द्रजंग शाही, दीपक भट्टराई, नवीन राई लगायतले भने नियमित महाधिवेशनमार्फतै नेतृत्व हस्तान्तरण गर्नुपर्ने तर्क प्रस्तुत गरेका छन्।

आगामी बाटो

सुशीला कार्की नेतृत्वको अन्तरिम सरकारले आगामी फागुन २१ गते निर्वाचनको घोषणा गरिसकेकाले कांग्रेसलाई चुनावी तयारीमा होमिनुपर्ने दबाब बढ्दै गएको छ। नेतृत्व परिवर्तनको प्रक्रियामा मतैक्यता जुटाउन असोज २६ गतेको केन्द्रीय समिति बैठक निर्णायक हुने अपेक्षा गरिएको छ।