शिक्षा, विज्ञान तथा प्रविधिमन्त्री महाबिर पुनले देशभक्त जेन–जी पुस्ता र सम्पूर्ण नेपाली जनतालाई आपसी गुटबन्दी र खुट्टा तानातान नगर्न आग्रह गरेका छन्। उनले राष्ट्रिय हित र विकासका लागि एकता अपरिहार्य रहेको बताउँदै, इतिहासकै पानाबाट गुटबन्दीले देशलाई कमजोर बनाएको प्रमाणित भइसकेको टिप्पणी गरे।

मन्त्री पुनले भने, “राष्ट्रिय हितको लागि गुटबन्दी र खुट्टा तानातान गरेर फाइदा होइन, झन् धेरै नोक्सान हुन्छ। त्यसैले अहिलेको परिप्रेक्षमा देश विकास र सार्वभौम सत्ताको रक्षाका लागि गुटबन्दी नगरौं भन्ने मेरो अनुरोध जेन–जी सहित सम्पूर्ण राष्ट्रप्रेमी नेपालीहरुलाई हो।”

उनले नेपालको राजनीतिक इतिहासलाई स्मरण गर्दै गुटबन्दी र खुट्टा तानातानका कारण देशले पटक–पटक ठूलो मूल्य चुकाउनुपरेको उदाहरण प्रस्तुत गरे।

इतिहासका ६ प्रमुख उदाहरणहरू
१. राजा रणबहादुर शाहदेखि राणातन्त्रसम्मको गुटबन्दी :
नाबालक राजा रणबहादुर शाहको प्रतिनिधित्व गर्ने विषयमा सुरु भएको गुटबन्दी पछि गीर्वाण युद्धविक्रम र राजेन्द्रविक्रम शाहसम्म आइपुग्दा चरम रूप लियो। त्यसको परिणामस्वरूप नेपालमा १०४ वर्ष लामो निरंकुश राणातन्त्र स्थापित भयो।

२. राणाहरूमाझकै गुटबन्दी :
वीर शम्शेरको पालादेखि राणा परिवारकै ‘क वर्ग’, ‘ख वर्ग’, ‘ग वर्ग’ भनेर वर्गीकरण गरी आपसी प्रतिद्वन्द्विता बढेपछि राणा शासन कमजोर हुँदै २००७ सालको जनक्रान्तिले अन्त्य गर्‍यो।

३. २००७ देखि २०१५ सम्मको खुट्टा तानातान :
प्रजातन्त्रको घोषणापछि २०१५ सालसम्म संसदीय चुनाव हुन नसक्नुको कारण पनि दलबीचको असहयोग थियो, जसले राजा महेन्द्रलाई पञ्चायती व्यवस्था ल्याउने अवसर दियो।

४. पञ्चायती कालको गुटबन्दी :
सूर्यबहादुर थापा, लोकेन्द्रबहादुर चन्द र मरिचमान सिंह जस्ता नेताहरूबीचको प्रतिस्पर्धा र राजपरिवारभित्रको गिरोहबाजीले पञ्चायती शासन कमजोर पार्‍यो र अन्ततः २०४६ सालको आन्दोलनमा ढल्यो।

५. २०४६ पछि पुनः दोहोरिएको प्रवृत्ति :
लोकतन्त्र आएपछि पनि दलभित्रको चरम गुटबन्दी र भ्रष्टाचारले जनताको आक्रोश बढायो। यही निराशा र असन्तोषको प्रतिक्रियाका रूपमा जेन–जी आन्दोलनले जन्म लिएको मन्त्री पुनको विश्लेषण छ।

६. जेन–जीलाई विशेष सुझाव :
पुनले जेन–जी पुस्तालाई एकताबद्ध भएर अघि बढ्न आग्रह गर्दै भने, “तपाईंहरूमा राजनीतिक संगठन छैन, तर देशमा सुशासन र समृद्धिको सपना छ। त्यो सपना पूरा गर्न एकता अत्यावश्यक छ। गुटबन्दीको इतिहास दोहोर्याउनु हुँदैन।”

उनले इतिहासका गलत अध्यायबाट सिकेर मातृभूमिको अस्तित्व र प्रतिष्ठाको रक्षा गर्न सबैलाई आह्वान गरे।

यसरी मन्त्री पुनले स्पष्ट सन्देश दिएका छन् — देशको विकास र स्वाभिमान एकतामा निहित छ, विभाजनमा विनाश छ।