लोकसारथि संवाददाता, काठमाडौं ।
आगामी फागुन २१ गते हुने प्रतिनिधिसभा सदस्य निर्वाचनका लागि आवश्यक मतपत्र छपाइ कार्य अन्तिम चरणमा पुगेको छ । मतपत्र छपाइ कार्य जनक शिक्षा सामग्री केन्द्र लिमिटेडले गरिरहेको छ ।

केन्द्रका प्रबन्ध निर्देशक यदुनाथ पौडेलका अनुसार दैनिक १२ देखि १५ लाख मतपत्र छपाइ भइरहेको छ भने आइतबारसम्म सबै मतपत्र छपाइ सम्पन्न हुने छ ।

उनका अनुसार हालसम्म छ प्रदेशका लागि आवश्यक मतपत्र छपाइ सम्पन्न भइसकेको छ र बागमती प्रदेशका लागि मतपत्र छपाइ सुरु गरिएको छ । कुल दुई करोड तीन लाख मतपत्र छपाइ गर्नुपर्नेमा एक करोड ७३ लाख मतपत्र छपाइ सम्पन्न भइसकेको केन्द्रले जनाएको छ । बाँकी ३० लाख मतपत्र आइतबारसम्म छपाइ सकिने जानकारी उनले दिए ।

प्रबन्ध निर्देशक पौडेलले उम्मेदवार धेरै भएका जिल्लामा ठूलो आकारको र उम्मेदवार कम भएका जिल्लामा सानो आकारको मतपत्र छाप्नुपर्ने भएकाले छपाइ प्रक्रियामा केही दिन ढिलाइ भएको बताए ।

छपाइ सम्पन्न भएका जिल्लाका लागि नेपाली सेनामार्फत मतपत्र ढुवानी कार्य सुरु भइसकेको पनि उनले जानकारी दिए । केन्द्रले छपाइ सम्पन्न गरेका १० लाख नमुना मतपत्र निर्वाचन आयोगले विभिन्न स्थानमा पुर्‍याइसकेको छ ।

यस्तै, समानुपातिकतर्फ दुई करोड आठ लाख ३० हजार मतपत्र छपाइ गरी ढुवानी सुरु भइसकेको केन्द्रले जनाएको छ ।

केन्द्रका अनुसार कर्णाली प्रदेशका सल्यान, रुकुम पश्चिम, डोल्पा, मुगु, हुम्ला, कालीकोट, जुम्ला, जाजरकोट, दैलेख र सुर्खेतका निर्वाचन क्षेत्रमा मतपत्र ढुवानी सकिएको छ । हालसम्म ५८ जिल्लाका १२४ निर्वाचन क्षेत्रको मतपत्र छपाइ सम्पन्न भई ढुवानी भइरहेको जनाइएको छ ।

मतपत्र छपाइ सम्पन्न भएका जिल्लामध्ये रुपन्देही, गुल्मी, पाल्पा, अर्घाखाँची, दाङ, बाँके, बर्दिया, झापा, मोरङ, सुनसरी, इलाम, पाँचथर, कैलाली, कञ्चनपुर लगायतका जिल्लाहरू पनि रहेका छन् ।