बुटवल । नृत्य निर्देशक संघ नेपाल रुपन्देही शाखाको आयोजनामा सम्पन्न हुँदै गरेको तीज डान्स आइडल -२०८२ को सन्दर्भमा पहिलो चरणमा छनोट पार गरेका प्रतियोगीहरूलाई संस्कार, संस्कृति र तीज पर्व विशेष प्रशिक्षण सम्पन्न भएको छ ।

कार्यक्रममा लुम्बिनी वाङ्मय प्रतिष्ठान रुपन्देहीका अध्यक्ष पुरुषोत्तम पाण्डेयले प्रशिक्षण प्रदान गर्नुभएको थियो । प्रशिक्षणका क्रममा पाण्डेयले संस्कार र संस्कृतिलाई साङ्गीतिक प्रस्तुतिसहित स्पष्ट पार्दै तीज पर्वको पौराणिक महत्त्व र आधुनिक सन्दर्भमा यसको महत्त्व, अवस्था, चुनौति र सम्भावनाका बारेमा विविध सन्दर्भसहित प्रशिक्षण प्रदान गर्नुभएको थियो ।

कार्यक्रममा प्रमुख अतिथि न्यु होराइजन मावि का उप प्राचार्य बासुदेव अर्यालले नृत्य निर्देशक संघले नवीन काम गरेको बताउनुभयो । नृत्य निर्देशक संघ रुपन्देहीका अध्यक्ष सुन्दर गुरुङको अध्यक्षता, कोषाध्यक्ष उषा खत्रीको संयोजकत्वमा सम्पन्न कार्यक्रमको सञ्चालन प्रदेश अध्यक्ष लोकेन्द्र शाहले गर्नुभएको थियो । डान्स आइडलमा संस्कार र संस्कृतिको सैद्धान्तिक विषयलाई प्रशिक्षणको रुपमा प्रवेश गराएको कुरा यस क्षेत्रमा पहिलो हुन सक्ने आयोजकको भनाइ छ ।