काठमाडौं । ७१औँ नेशनल फिल्म अवार्डको भव्य समारोह यही सेप्टेम्बर २३ मा नयाँ दिल्लीस्थित विज्ञान भवनमा सम्पन्न भयो। कार्यक्रममा बलिउडदेखि दक्षिण भारतीय फिल्म उद्योगसम्मका ठूला कलाकारहरूको उपस्थितिले माहोल भव्य बनेको थियो। राष्ट्रपति द्रौपदी मुर्मूको आतिथ्यमा आयोजित कार्यक्रममा कलाकारहरूले आभार व्यक्त गरे।

यस वर्ष सन् २०२३ मा रिलिज भएका चलचित्रलाई सम्मान गरिएको थियो। समारोहमा बलिउड सुपरस्टार शाहरुख खान, रानी मुखर्जी, मलयालम सुपरस्टार मोहनलाल, विक्रान्त म्यासीलगायत दर्जनौँ चर्चित कलाकारको सहभागिता थियो।

शाहरुखलाई पहिलो नेशनल अवार्ड

बलिउड बादशाह शाहरुख खानले आफ्नो करिअरमै पहिलोपटक नेशनल अवार्ड प्राप्त गरेका छन्। उनलाई उत्कृष्ट अभिनेताको (बेस्ट एक्टर) श्रेणीमा सम्मान दिइएको हो।
यसैगरी रानी मुखर्जीलाई उत्कृष्ट अभिनेत्री (बेस्ट एक्ट्रेस) को अवार्ड प्रदान गरियो भने मलयालम सुपरस्टार मोहनलाललाई दादासाहेब फाल्के अवार्डले विभूषित गरियो।

त्रिशा थोसरको क्यूटनेसले जित्यो सबैको मन

समारोहको सबैभन्दा मनमोहक क्षण भने बाल कलाकार त्रिशा थोसरको उपस्थिति रह्यो। आफ्नो अवार्ड लिन स्टेजमा पुगेकी त्रिशाको प्यारी मुस्कान, मासूम अनुहार र सहजताले सम्पूर्ण हल मोहित बनायो।
सोसल मिडियामा उनको भिडियो अहिले तीव्र रूपमा भाइरल भइरहेको छ। दर्शकहरूले त्रिशाको क्यूटनेस र प्रतिभाको प्रशंसा गर्दै प्रतिक्रिया जनाएका छन्।

बाल कलाकारलाई विशेष सम्मान

त्रिशालाई फिल्म ‘NAL 2’ मा उत्कृष्ट अभिनयका लागि नेशनल अवार्ड प्रदान गरिएको हो। उनी यसअघि महेश मांजरेकर र सिद्धार्थ जाधवसँग समेत अभिनय गरिसकेकी छन्। साथै, महेश मांजरेकर निर्देशित ‘पुन्हा शिवाजीराजे भोसले’ मा पनि मुख्य भूमिकामा देखिएकी थिइन्।

त्रिशासहित श्रीनिवास पोकले, भार्गव जगताप, कबीर खंदारे र सुकृति वेणी बन्द्रेड्डीलाई पनि यसपटक विशेष सम्मान प्रदान गरिएको छ। यी साना कलाकारहरूको प्रस्तुति र अभिनय प्रतिभा अगाडि ठूला-ठूला कलाकारहरू समेत ओझेल परे।

यसरी, ७१औँ नेशनल फिल्म अवार्डमा शाहरुख खानले आफ्नो करिअरको पहिलो राष्ट्रिय सम्मान पाए पनि, सबैभन्दा चर्चित ‘स्टार मोमेन्ट’ भने बाल कलाकार त्रिशा थोसरकै नाममा रह्यो।