लोकसारथि संवाददाता, काठमाडौं ।

यस वर्षको मनसुनमा आएको बाढी र पहिरोका कारण क्षति पुगेका सडक र पुल संरचनाको पुनर्निर्माणका लागि करिब १२ अर्ब ३८ करोड रुपैयाँ लाग्ने अनुमान गरिएको छ। असोज १८, १९ र २० गतेका साथै त्यसअघि भएका विपद्ले देशभरका मुख्य राजमार्ग र वैकल्पिक सडकहरूमा ठूलो क्षति पुर्‍याएका थिए।

भौतिक पूर्वाधार तथा यातायात मन्त्रालयका अनुसार चालू वर्षको मनसुनजन्य विपद्बाट नष्ट वा क्षतिग्रस्त भएका मुख्य राजमार्ग, वैकल्पिक सडक, बेलिब्रिज र स्थायी पुल पुनर्निर्माणका लागि मात्रै करिब १० अर्ब ६८ करोड रुपैयाँ आवश्यक पर्नेछ। त्यस्तै, गत वर्षको विपद्बाट क्षति भएका संरचना पुनर्निर्माणका लागि बाँकी १ अर्ब ७० करोड रुपैयाँ छुट्ट्याइने तयारी छ।

मन्त्रालयका जिम्मेवारी पाएका ऊर्जा, जलस्रोत तथा सिँचाइ, भौतिक पूर्वाधार तथा यातायात र शहरी विकास मन्त्री कुलमान घिसिङले बाढीपहिरोबाट अवरुद्ध भएका सडकहरूलाई उच्च प्राथमिकतामा पुनः सञ्चालनमा ल्याउने कार्य जारी रहेको बताए।
उनका अनुसार, “अवरुद्ध सडक पुनः सञ्चालनका लागि उपकरण र जनशक्ति तत्काल परिचालन गरिएको छ। मन्त्रालय र म आफैं नियमित अनुगमनमा छु,” उनले भने।

सबैभन्दा बढी क्षति राजमार्गमा

मन्त्रालयका प्रारम्भिक मूल्यांकन अनुसार, यस वर्षको मनसुनजन्य विपद्बाट सबैभन्दा बढी क्षति मुख्य राजमार्गहरूमा पुगेको छ।
विशेष गरी मेची राजमार्गको पुनर्निर्माणका लागि मात्र डेढ अर्ब रुपैयाँ लाग्ने अनुमान गरिएको छ।
त्यस्तै, कोशी, मध्यपहाडी, हुलाकी, अरनिको, कान्ति, र नारायणघाट–मुग्लिङ राजमार्गलगायतमा क्षति पुगेको र तिनको पुनर्निर्माणका लागि झण्डै तीन अर्ब ७७ करोड रुपैयाँ आवश्यक पर्ने देखिएको छ।

पुल र वैकल्पिक सडकमा पनि ठूलो क्षति

मनसुनका कारण भत्किएका वा क्षतिग्रस्त १७ वटा स्थायी पुल पुनर्निर्माणमा करिब चार अर्ब ५२ करोड रुपैयाँ खर्च हुने अनुमान छ।
त्यस्तै, सडक सञ्चालनका लागि तत्काल आवश्यक पर्ने नयाँ बेलिब्रिज निर्माणमा ८० करोड रुपैयाँ र वैकल्पिक सडक पुनर्निर्माणमा करिब एक अर्ब ५९ करोड रुपैयाँ लाग्ने मन्त्रालयले जनाएको छ।

उच्च प्राथमिकतामा पुनःसंरचना

मन्त्री घिसिङका अनुसार, राजमार्ग सञ्चालन र यातायात प्रवाह पुनःस्थापनालाई उच्च प्राथमिकतामा राखेर मन्त्रालयका मातहतका निकायहरू सक्रिय छन्।
विपद्बाट अवरुद्ध भएका सडकहरूमा अहिले पनि उपकरण र प्राविधिक टोली परिचालन भइरहेका छन्।

सरकारले पुनर्निर्माण कार्य छिट्टै सुरु गर्ने तयारी गरेको छ। सम्बन्धित निकायहरूका अनुसार, प्राथमिक पुनःसंरचना सम्पन्न भएपछि स्थायी पुनर्निर्माण र दीर्घकालीन पूर्वाधार सुदृढीकरणमा जोड दिइनेछ।

यसरी, १२ अर्ब ३८ करोड रुपैयाँको अनुमानित लागतले आगामी महिनाहरूमा मुलुकभरका क्षतिग्रस्त सडक र पुलहरू पुनःजीवित हुने अपेक्षा गरिएको छ।