हुम्ला । अनुदान वापतको १ सय ६० बोरा नुन बाजुरा जिल्लाको हिमाली गाउँपालिकाको कवाडीमा अलपत्र परेको छ । नुन पाँच वर्षदेखि अलपत्र परेको हो । कवाडीमा एक जना स्थानीयको घरमा करिब पाँच वर्षदेखि अलपत्र अवस्थामा रहँदा हुम्ला जिल्लाका स्थानीय नागरिक नुन पाउनबाट वञ्चित भएका छन् ।

नेपालगञ्जदेखि ढुवानी भएर बाजुराको कवाडी गोदाममा पुगेको नुनको पाँच वर्षसम्म पनि खोजीनीति नहुँदा जिल्लाका नागरिक उक्त नुनपाउनबाट वञ्चित भएको स्थानीय जयरुद्र ढकालले गुनासो गर्नुभयो । उहाँले समयमा नुन नपुगेपछि जिल्ला सदरमुकाम सिमकोटको जिल्ला साल्ट ट्रेडिङ कर्पाेरेसन कार्यालयमा नुनु अभाव भन्दै गएको बताउनुभयो । यस अघि हप्तामा एक दिन आइतबार नुन वितरण गर्ने गरेको भए पनि एक महिनादेखि नुन अभावका कारण स्थानीयले प्रयाप्त नुन नपाएको अर्का स्थानीय ऐटन रावलले गुनासो गर्नुभयो ।

नेपाल सरकारले अनुदानमा ९ रुपियाँमा विक्रि वितरण गर्दै आएको नुन अभावले सर्वसाधरण नुन पाउनबाट वञ्चित भएको स्थानीय रावलले गुनासो गर्नुभयो । यस जिल्लाका लागि ढुवानी गरेको नुन कवाडीसम्म पुगे पनि समयमा गन्तव्य पुग्न नसक्दा कवाडीमा अलपत्र बनेको छ ।

नुनको प्याकेटमा एनपिजे लेखिएका कारण धनगढीको नभइ नेपालगञ्जबाट ढुवानी भएको साल्ट ट्रेडिङ कर्पाेरेसनका प्रमुख राज बहादुर लामाले बताउनुभयो । तर ठेकेदार को हो, कसको ठेक्का हो र ढुवानी कसले गरेको भन्नेबारे यकिन हुन नसके पनि हुम्ला जिल्लाको लागि नुन भएको प्रमुख लामाको भनाइ छ ।

ठेकेदारले नुन ढुवानी गरेको भन्ने जानकारी भए पनि यकिन हुन नसकेको बाजुरा जिल्लाको हिमाली गाउँपालिका–५ का वडाअध्यक्ष प्रदिप बुढथापाले बताउनु भएको छ । ढुवानी भएदेखि हालसम्म ठेकेदार पनि सम्र्पकमा नआएको र अन्य कुनै निकायबाट खोजीनीति नभएको र ढुवानीका लागि पहल नभएको उहाँले बताउनुभयाे ।